NATO Azərbaycanda hərbi təhsil sisteminin islahatı istiqamətində fəaliyyətini genişləndirir. Alyans nümayəndələri Bakıda keçirilən görüşlərdə mövcud dəyişiklikləri qiymətləndirib və gələcək əməkdaşlıq istiqamətlərini müzakirə ediblər
NATO rəsmiləri martın 31-dən aprelin 2-dək Bakıda yerləşən Milli Müdafiə Universitetinə səfər edərək Azərbaycanın hərbi təhsil sistemində aparılan islahatları nəzərdən keçiriblər.
“The Brussels Times” nəşri bu barədə NATO-nun mətbuat xidmətinə istinadən məlumat yayıb. Bildirilib ki, Alyansın Müdafiə və Təhlükəsizlik Əməkdaşlığı Direktorluğunun nümayəndələri universitet rəhbərliyi və əməkdaşları, həmçinin əlaqəli hərbi təhsil müəssisələrinin şəxsi heyəti ilə görüşlər keçiriblər.
Müzakirələr NATO-nun Müdafiə Təhsilinin Təkmilləşdirilməsi Proqramı (DEEP) çərçivəsində baş tutub. Proqram tərəfdaş ölkələrə müdafiə təhsili sahəsində məsləhət və dəstək göstərilməsini nəzərdə tutur.
Azərbaycanın hərbi təhsil müəssisələrinin rəhbərləri NATO nümayəndə heyətinə görülən işlər və əldə olunan nəticələr barədə məlumat veriblər.
Qeyd olunub ki, Azərbaycan Müdafiə Nazirliyinin müraciəti əsasında DEEP proqramı müəllim heyətinin və tədris proqramlarının inkişafını dəstəkləməyə davam edəcək, eləcə də ingilis dili hazırlığı və qiymətləndirmə sisteminin NATO standartlarına uyğunlaşdırılmasına kömək edəcək.
Onlayn təhsil və gizir heyətinin inkişafı
NATO həmçinin bildirib ki, ötən ilin sonunda DEEP ekspertlərinin səfərindən sonra Azərbaycanın e-təhsil platformasını idarə etmək imkanlarının artırılması istiqamətində işlər aparılır. Məqsəd bu sistemin ölkənin bütün hərbi təhsil strukturu üzrə genişləndirilməsidir.
Proqram çərçivəsində cari ilin sonuna planlaşdırılan növbəti səfərdən sonra Azərbaycanın gizir və çavuşları əhatə edən kiçik zabit heyətinin inkişafına da dəstək veriləcək.
Azərbaycan Ali Hərbi Məktəbinin xüsusi müşaviri, general-mayor Hüseyn Mahmudov DEEP proqramının dəstəyini yüksək qiymətləndirib və avqustun 8-də imzalanan Sülh Bəyannaməsindən sonra bu sahədə yeni dinamikanın yarandığını bildirib.
