İran parlamenti Cənubi Qafqazla bağlı bəyanat yayıb. “Tasnim” agentliyinin məlumatına görə, sənəddə qeyd olunur ki, “tanınmış sərhədlərin dəyişdirilməsi, zorla dəhlizlərin yaradılması və ya “Zəngəzur dəhlizi” kimi layihələrin həyata keçirilməsi region ölkələrinin maraqları ilə ziddiyyət təşkil edir və kollektiv təhlükəsizliyə birbaşa təhdid yaradır”.

Bəyanatda vurğulanır ki, Cənubi Qafqaz İran üçün yalnız coğrafi sərhəd deyil, həm də ölkənin təhlükəsizlik perimetri, strateji dərinliyi və sivilizasiya məkanının bir hissəsidir:

“Bu region əsrlər boyu İranla güclü tarixi, mədəni və hərbi-siyasi əlaqələrə malik olub və bu gün də ölkənin ərazi bütövlüyünün qorunmasında, milli təhlükəsizliyin təmin edilməsində həyati rol oynayır”.

İran parlamenti xatırladıb ki, Tehran daim region problemlərinin region ölkələri arasında birbaşa dialoq yolu ilə, xarici qüvvələrin müdaxiləsi olmadan həllini dəstəkləyib.

Bəyanatda daha sonra bildirilir:

“Beynəlxalq hüququn mübahisəsiz prinsiplərinə əsaslanaraq, xatırladırıq ki, beynəlxalq səviyyədə tanınmış sərhədlərin aidiyyəti hökumətlərin razılığı olmadan dəyişdirilməsi BMT Nizamnaməsinin və dövlətlərin ərazi bütövlüyü prinsipinin açıq şəkildə pozulmasıdır”.

İran əlavə edib ki, milli maraqlara və təhlükəsizliyə qarşı hər hansı təhdid halında bütün siyasi, hüquqi və qanuni vasitələrdən istifadə etmək hüququnu özündə saxlayır. Bəyanatda Cənubi Qafqazın yalnız təhlükəsizlik baxımından deyil, həm də İran və region üçün mühüm enerji, tranzit və iqtisadi marşrut kimi həyati əhəmiyyət daşıdığı vurğulanır.

“Hər hansı iqtisadi və tranzit layihəsi İranın geo-iqtisadi mövqelərini zəiflətməyə yönəlmişsə, bu, qəbuledilməzdir. İran bütün ölkələrin milli suverenliyinə hörmət etməklə region dövlətlərinin maraqlarının nəzərə alınmasını vacib hesab edir”.

İran parlamenti həmçinin qonşuluq prinsiplərinə riayət olunmasına çağıraraq, region dövlətlərini gərginlik yaradan addımlardan çəkinməyə və xarici dövlətlərin iştirakı olmadan əməkdaşlığı genişləndirməyə dəvət edib.

“İqtisadi və tranzit əlaqələrin inkişafı yalnız mövcud sərhədlər çərçivəsində və qarşılıqlı hörmət əsasında davamlı ola bilər. İran İslam Respublikası bütün regional tərəflərlə əməkdaşlıqda Cənubi Qafqazda vəziyyətin nizamlanmasına töhfə verməyə hazırdır. İran xalqının nümayəndələri hər cür təhdidə cavab verəcəklər”.