Rusiyanın ATƏT-dəki daimi nümayəndəsi Aleksandr Lukaşeviç bildirib ki, Moskva Azərbaycanın və Ermənistanın ATƏT-in Minsk qrupunun buraxılması barədə birgə qərarını dəstəkləyir. Onun sözlərinə görə, qrupun tamamilə ləğvi 2025-ci ilin dekabrına qədər başa çatdırılacaq.

Diplomat qeyd edib ki, söhbət üç institutun fəaliyyətinin dayandırılmasından gedir – Minsk qrupu, ATƏT-in fəaliyyətdə olan sədrinin şəxsi nümayəndəsi və Yüksək səviyyəli planlaşdırma qrupu. 

“Tərəflərin bu qurumların saxlanmasının məqsədəuyğun olmadığı barədə mövqeyini nəzərə alaraq, onların buraxılmasına mane olmaq üçün əsas görmürük”, – deyə Lukaşeviç bildirib.

Avqustun 26-da Azərbaycanın xarici işlər naziri Ceyhun Bayramov açıqlamışdı ki, ATƏT-in Minsk qrupunun buraxılması ilə bağlı qərar sentyabrın 1-də veriləcək. Onun sözlərinə görə, bu mexanizm əslində çoxdan sülh prosesindən kənarlaşdırılıb.

Minsk qrupunun buraxılması Azərbaycanla Ermənistan arasında sülh sazişinin bağlanması üçün Bakının irəli sürdüyü iki şərtdən biridir. Digər şərt isə Ermənistanın Konstitusiyasına dəyişiklik edərək Azərbaycanın suverenliyi və ərazi bütövlüyünə iddialardan imtina etməsidir. Minsk qrupu ilə bağlı müraciəti Bayramov və onun erməni həmkarı Ararat Mirzoyan avqustun 8-də Vaşinqtonda imzalayıb və avqustun 11-də sənəd təşkilata göndərilib.

Lukaşeviç prosedurun belə olacağını açıqlayıb: ATƏT-in Daimi Şurası (siyasi məsləhətləşmələrin əsas orqanı) üzvlərə “səssiz razılıq” əsasında nazirlərin qərarını təsdiqləməyi tövsiyə edib. Əgər sentyabrın 1-nə qədər heç kim etiraz bildirməsə, qrupun buraxılması barədə qərar qəbul edilmiş sayılacaq. 

“Bununla yanaşı, qərarın icrası ilə bağlı inzibati və maliyyə tədbirlərinin həyata keçirilməsi bir neçə ay çəkəcək. ATƏT-də onların bu ilin dekabrınadək tamamlanacağı gözlənilir. Bundan sonra Qarabağ münaqişəsinin həllinə yardım edən bütün üç qurum fəaliyyətini tamamilə dayandıracaq”, – deyə Rusiya nümayəndəsi bildirib.