Azərbaycan Xalq Cəbhəsi Partiyası (AXCP) sədr Əli Kərimli və partiyanın bir sıra üzvlərinin saxlanılması ilə bağlı bəyanat yayıb. 

Bəyanatda bildirilib ki, partiya sədri Əli Kərimlini bu gün DTX əməkdaşları saxlayıb və onun evində axtarış aparılıb.

“Bu gün məlum olub ki, Azərbaycan demokratik müxalifətinin lideri, AXCP sədri Əli Kərimli Dövlət Təhlükəsizliyi Xidmətinin (DTX) əməkdaşları tərəfindən saxlanılıb. Onun saxlanılması üçün heç bir rəsmi əsas açıqlanmayıb. Həmçinin, onun evində axtarış aparılıb”.

Partiya həmçinin bildirib ki, AXCP Rəyasət Heyətinin üzvü Məmməd İbrahimin evində də axtarış aparılıb, o da saxlanılıb. Partiyanın başqa bir neçə nəfər fəalının da saxlanıldığı vurğulanıb.

Bəyanatda saxlanılmalar “Azərbaycanda son müstəqil siyasi qüvvəni aradan qaldırmaq cəhdi” kimi qiymətləndirilib:

“Bugünkü saxlanılma hakimiyyətin Azərbaycanda son müstəqil siyasi qüvvəni aradan qaldırmaq və xalqın demokratiya və azadlıq uğrunda mübarizəsini tamamilə boğmaq cəhdi olaraq qiymətləndirilməlidir.

Bəyan edirik ki, Əli Kərimlinin saxlanılması sırf siyasi motivlidir. Son illərdə hakimiyyət ona faktiki blokada tətbiq edib. Buna baxmayaraq, Əli Kərimli Azərbaycanda əsas demokratik fiqurlardan biri olaraq qalır: onun aparıcı beynəlxalq mediaya verdiyi müsahibələr və qlobal siyasi forumlara dəvət alması İlham Əliyev rejimini narahat edib”.

AXCP bu əməliyyatı ölkədə siyasi mühitə daha bir zərbə kimi qiymətləndirib:

“Siyasi fəaliyyətin, demək olar ki, tamamilə qadağan olunduğu, vətəndaş azadlıqlarının ciddi şəkildə məhdudlaşdırıldığı bir şəraitdə bu əməliyyat siyasi repressiyaların daha da gücləndirilməsi istiqamətində növbəti addımdır”.

AXCP Əli Kərimli və saxlanılan digər şəxslərin azad edilməsini tələb edib:

“Əli Kərimli, Məmməd İbrahim və digər saxlanılan üzvlər dərhal azad olunmalı, onlara qarşı təqiblər dayandırılmalı, hüquqi müdafiəyə çıxış və təhlükəsizlik təmin edilməlidir”.

Partiya beynəlxalq ictimaiyyəti də hadisəyə reaksiya verməyə çağırıb:

“Beynəlxalq ictimaiyyət, insan haqları təşkilatları və demokratik hökumətlər baş verənlərə təcili reaksiya göstərməli və Azərbaycan hakimiyyətindən beynəlxalq insan hüquqları öhdəliklərinə əməl etməyi tələb etməlidirlər”.

Bu gün, noyabrın 29-da AXCP sədri Əli Kərimli və partiyanın bir neçə üzvünün evində axtarış aparılıb. Axtarışı Dövlət Təhlükəsizlik Xidmətinin (DTX) həyata keçirdiyi bildirilib.

Əli Kərimlidən başqa AXCP rəyasət heyətinin üzvü Məmməd İbrahimin də evində axtarış aparıldığı, saxlanıldığı deyilib. Onun oğlu Turan İbrahim “Facebook” hesabında əvvəlcə atası ilə əlaqə saxlaya bilmədiyini, daha sonra isə onun saxlandığı barədə məlumat yayıb:

“13 nəfər evdə axtarış aparıb, Məmməd İbrahimi götürüb aparıblar. Telefonunu və kompüterini götürüblər”.

Həmçinin, AXCP fəallarından Faiq Əmirlinin də saxlandığı deyilib.

AXCP Sabunçu rayon şöbəsinin sədri Fariz Əlizadə isə dünən, noyabrın 28-də səhər saatlarında evindən çıxıb, ondan xəbər yoxdur. Partiyadan onun tutulduğunu düşünürlər.

Hökumətyönlü media axtarış və saxlanılmaların Ramiz Mehdiyevin DTX-də istintaq olunan cinayət işi ilə əlaqədar olduğunu yazıb.

Bir müddət əvvəl barəsində cinayət işi açılan Ramiz Mehdiyevlə bağlı hökumətyönümlü medianın məlumatlarında onun Əli Kərimli ilə əlaqələrindən bəhs edilirdi.

Prezident Administrasiyası Aparatının və Milli Elimlər Akademiyasının keçmiş rəhbəri Ramiz Mehdiyevin Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunduğu bildirilir.

Oktyabrın 14-də Səbail rayon məhkəməsi Ramiz Mehdiyev barədə 4 ay müddətinə ev dustaqlığı qətimkan tədbiri seçib.