Həyat yoldaşı: "Bu ittihamlar Fəridə qarşı heç bir sübutun olmamasından qaynaqlanan absurd ittihamlardır"

Avqustun 16-da "Abzas Media işi" üzrə həbs olunan iqtisadçı Fərid Mehralızadəyə qarşı  7 ağır maddə ilə yeni ittiham irəli sürülüb.  

Bu barədə məlumatı onun həyat yoldaşı Nərgiz Muxtarova verib. 

"Fərid Mehralızadəyə qarşı Cinayət Məcəlləsinin 192.3.2, 193-1.3.1, 193-1.3.2, 206.4, 320.1, 320.2 və 213.2.1-ci maddələri ilə (xüsusilə külli miqdarda gəlir əldə etməklə qanunsuz sahibkarlıq, mütəşəkkil dəstə şəklində cinayət yolu ilə əldə edilmiş xeyli miqdarda pul vəsaitlərini leqallaşdırma, mütəşəkkil dəstə tərəfindən törədilmiş qaçaqmalçılıq, sənəd saxtalaşdırma və saxta sənədlərdən istifadə etmə, mütəşəkkil dəstə halında vergi ödəməkdən yayınma) yeni ittiham irəli sürülüb”, - deyə iqtisadçının həyat yoldaşı  "Facebook" hesabında yazıb.

Nərgiz Muxtarova qeyd edib ki, ittihamlar həyat yoldaşına qarşı heç bir sübutun olmamasından qaynaqlanan absurd ittihamdır.

"Fərid illərdir rəsmi əmək müqaviləsi ilə bankda işləyib. Rəsmi maaşı olan şəxsin rahatlıqla ala biləcəyi qiymətdə  rəsmi köçürmə ilə öz adına aldığı və şəxsi istifadə etdiyi avtomobilini cinayət yolu ilə əldə olunmuş pulun leqallaşdırılması kimi təqdim edirlər",  - deyə o əlavə edib. 

Abzas Media-nın əldə etdiyi məlumata görə bu iş üzrə cəlb olunmuş digər şəxslərə də yeni ittihamlar irəli sürüləcək. 

Fərid Mehralızadəni mayın 31-də işdən çıxarkən polis saxlayıb. Daha sonra onun evində axtarış aparılıb.

İyunun 1-də ona qarşı “Abzas Media işi” üzrə Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Xətai rayon Məhkəməsinin qərarı ilə onun barəsində 3 ay 20 gün həbs qətimkan tədbiri seçilib.

Elə həmin gün “Abzas Media”nın müvəqqəti rəhbərliyi bəyanat yayaraq Mehralızadənin bu media qurumu ilə heç bir əməkdaşlığının və əlaqəsinin olmadığını bildirib.

Ötən ilin noyabrından etibarən “Abzas Media”nın 6 əməkdaşı “qaçaqmalçılıq” ittihamı ilə həbs olunub. Bir neçə başqa şəxs də bu iş üzrə təqsirləndirilən şəxs qismində istintaqa cəlb olunub və ya şahid qismində dindirilib.  

Yerli və beynəlxalq hüquq müdafiə təşkilatları bu təqibləri siyasi motivli hesab edir və həbs olunanların azad edilməsinə, onlara qarşı ittihamların geri götürülməsinə çağırırlar.