Almaniyalı deputat: "Hakim partiya və onların etibarlı şəxsləri Aİ-ni ləkələməyə tam sərmayə qoyublar və Putinin, Lukaşenkonun, Orbanın oyun kitabından hiylələr öyrəniblər"

Xaricdən maliyyələşən media və vətəndaş cəmiyyəti təşkilatlarını “xarici təsir qüvvələrinin agentləri” kimi qələmə verən qanun layihəsi Gürcüstan parlamentinə təqdim olunub. Bu qanunun Rusiyadakı kimi repressiyalara səbəb olacağı düşünülür.

Layihəni “Xalqın gücü” adlı bir qrup hökumətyönlü millət vəkili irəli sürüb.

Təkliflərini çərşənbə axşamı elan edən qrup layihənin "açıqlıq və şəffaflıq prinsiplərinə" əsaslandığını bildirib.

Qanun layihəsini ilk dəfə Rusiya hökuməti 2012-ci ildə qəbul edib və media azadlığını, fərqli fikirləri boğmaq üçün istifadə edilib.

Tənqidçilər bunun Gürcüstanda oxşar repressiyalara səbəb ola biləcəyi ilə bağlı xəbərdarlıq edirlər. 

Avropa Parlamentinin üzvü Andreus Kubilus “OC Media”-ya bildirib ki, qanunun qəbul edilməsi ölkənin Aİ-yə üzvlük təklifini təhlükə altına ata bilər.

“OC Media”-nın əldə etdiyi qanun layihəsinin surəti göstərir ki, bu, ölkədə fəaliyyət göstərən istənilən yayımçı, qəzet və ya gürcüdilli onlayn media platformasına, eləcə də Gürcüstanda qeyri-hökumət təşkilatı kimi qeydiyyatdan keçmiş təşkilata təsir göstərəcək. 

Gəlirinin 20%-dən çoxunu “xaricdən” alan hər hansı belə təşkilat “Xarici Təsir Qüvvələrinin Agentləri Reyestrində” qeydiyyatdan keçməyə məcbur olacaq və ya 9.400 ABŞ dolları məbləğində cərimə ilə üzləşəcək.

"Xarici təsir qüvvələrinin agentləri" hesab edilənlər illik gəlir bəyannamələrini təqdim etməyə borclu olacaqlar.

Qanun layihəsi həmçinin Gürcüstanın Ədliyyə Nazirliyinə "xarici təsir qüvvələrinin agentləri" hesab etdikləri təşkilatları araşdırmaq və sənədləri əldə etmək səlahiyyəti verəcək.

Gürcüstan parlamenti fevralın 20-də qanun layihəsini gələcək müzakirələr üçün qeydə alıb.

“Xalq Gücü” “OC Media”-ya bildirib ki, yaxın günlərdə “media məkanında yalan və söyüşlərə qarşı qabaqlayıcı tədbirlərin görülməsini” təmin edən daha bir qanun layihəsini də açıqlamağı planlaşdırırlar.

“Gürcü Arzusu-Demokratik Gürcüstan” partiyası hələlik qanun layihəsi ilə bağlı mövqeyini açıqlamayıb və sorğuya cavab verməyib.

Bununla belə, partiyanın bir neçə deputatı layihənin lehinə danışıb. Mixeil Sarcveladze jurnalistlərə deyib ki, o, bunda səhv bir şey görmür, İrakli Kadagişvili isə “hər yerdə və hər şeydə şəffaflıq olmalıdır” cavabını verib.

Toplanan jurnalistlər Rusiyanın “xarici agent” qanunundan nümunə götürülən qanunvericiliyə işarə edərək əllərində “Putin qanununa yox”, “Bizi susdura bilməzsiniz” və “Rusiya hüququ Gürcüstanın seçimi deyil” sözləri yazılmış plakatlar tutublar.

Parlamentin qanun layihəsini ilk oxunuşda qeydə almasından bir neçə saat sonra Gürcüstan prezidenti Salome Zurabişvili ona veto qoya biləcəyi ilə bağlı bəyanat yayıb.

O qeyd edib ki, qanunvericilik Gürcüstanın “Avropa gələcəyini” relsdən çıxarmaqla hədələyir və ölkəni “Rusiyanın pis modelinə” yaxınlaşdırır.

“Gürcüstan prezidenti belə bir qanun layihəsini dəstəkləyə bilməz”, bəyanatda deyilir.

Almaniyalı deputat Viola fon Kramon xəbərdarlıq edib ki, bu qanun “Gürcüstanda Putin tipli hakimiyyətin qurulmasına” töhfə verəcək.

"Hakim partiya və onların etibarlı şəxsləri Aİ-ni ləkələməyə tam sərmayə qoyublar və Putinin, Lukaşenkonun, Orbanın oyun kitabından hiylələr öyrəniblər" - Kramon deyib.

Fevralın 16-da ABŞ Dövlət Departamenti “belə bir qanunun potensial olaraq Gürcüstanın Avro-Atlantik inteqrasiyasını poza biləcəyi” və bu qanunun Gürcüstanda söz azadlığını və demokratiyanı təhdid edəcəyi barədə xəbərdarlıq edib.

Bu yazı OC Media ilə əməkdaşlıq çərçivəsində yayımlanır. Mətnin orijinalını ingilis dilində buradan oxuya bilərsiniz.