Bakı Qarabağdakı mədənlərin fəaliyyətinin dayandırılmasını və Laçın dəhlizi ilə yüklərin daşınmasına nəzarət mexanizminin yaradılmasını tələb edib

ABŞ dövlət katibi Entoni Blinken  23 yanvarda  prezident İlham Əliyevə zəng edərək ondan Laçın dəhlizinin dərhal açılmasını istəyib.

Dövlət Departamentinin mətbuat xidmətinin məlumatına görə, Blinken Laçın dəhlizində humanitar böhran riskinin Ermənistan və Azərbaycan arasında sülh perspektivlərini sarsıtdığını vurğulayıb.

Dövlət katibi prezident Əliyevi Ermənistanla ikitərəfli sülh danışıqlarında səylərini artırmağa çağırıb.

Blinken Twitter-dəki mikrobloqunda "ABŞ bu səylərə kömək etməyə sadiqdir" yazıb.

Ötən həftə Azərbaycan Qarabağdakı qondarma hakimiyyətə təkliflər paketi təqdim edib, lakin Xankəndi təklifləri qəbul etməyib.

Bu barədə “Azadlıq” radiosunun Azərbaycan xidmətinə Beynəlxalq Münasibətlərin Təhlili Mərkəzinin rəhbəri, ekspert Fərid Şəfiyev məlumat verib.

Şəfiyevin sözlərinə görə, Bakı Qarabağdakı mədənlərin fəaliyyətinin dayandırılmasını və Laçın dəhlizi ilə yüklərin daşınmasına nəzarət mexanizminin yaradılmasını tələb edib:

“Bizim ərazimizə minaların daşınması və Laçın yolundan qeyri-humanitar məqsədlər üçün istifadə olunması ilə bağlı sübutlarımız var. Söhbət ilk növbədə mülki avtomobillərdə mülki geyimdə səfərə çıxan erməni hərbçilərindən və daşınan döyüş sursatlarından gedir. Qərb ölkələri bizə tez-tez deyirlər ki, bizim öhdəliklərimiz var. Bəli, var, lakin, digər tərəfdən, bu yoldan təyinatı üzrə istifadə edilməlidir”.

Bakının bu məsələyə etirazının olması faktını ötən həftə Rusiya Xarici İşlər Nazirliyinin rəhbəri azərbaycanlı həmkarı ilə telefon danışığından sonra da bildirib.

“Azərbaycanlılar məlumat veriblər ki, Ermənistan tərəfi bu dəhliz boyu minalar çatdırıb. İndi bizim hərbçilər bunu araşdırırlar” - deyə Rusiya XİN başçısı Lavrov bildirib.

Azərbaycanlı ekspert həmçinin qeyd edib ki, onun məlumatına görə, danışıqlar nəticə verməyib. O, bunun Qarabağın qondarma dövlət naziri Ruben Vardanyanın təsiri ilə bağlı olduğunu bildirib.

Vardanyan özü dünən “BBC” telekanalına müsahibəsində Xankəndinin danışıqlara hazır olduğunu bildirib:

“Əgər Azərbaycan tərəfi danışıqların hər iki tərəf üçün olduğunu başa düşsə, biz danışıqlara hazırıq. Çünki müstəqillik tələbinin ilk günündən deyirik: başa düşürük və qəbul edirik ki, biz yan-yana yaşayacağıq, amma ayrı ərazi, ayrı dövlət olacağıq, ayrı qaydalar, qanunlar olacaq”- Vardanyan vurğulayıb.

Ermənistan İstintaq Komitəsi ötən il sentyabrın 13-14-də Azərbaycanla baş verən qarşıdurmada həlak olan hərbçilərin sayının 224 nəfərə çatdığını açıqlayıb. 3 hərbçi itkin düşmüş hesab edilir.

Azərbaycan tərəfi 80 nəfər hərbçinin həlak olduğu və ya itkin düşdüyünü açıqlayıb.

Hər iki tərəfdən yüzlərlə insan yaralanıb.