Rusiya müharibədən xeyli əvvəl Ukraynada gizli casuslar şəbəkəsi yaradıb. "Reuters"-in araşdırmasında belə deyilir.
Fevralın 24-də ilk rus qoşunları Çernobıl Atom Elektrik Stansiyasına çatdıqda, onlar obyekti mühafizə etmək vəzifəsi daşıyan Ukrayna bölmələri ilə toqquşublar. İki saat keçməmiş Ukrayna Milli Qvardiyasının 169 əsgəri döyüşmədən silahı yerə qoyub. Araşdırmaçılar beş mənbəyə istinadən bildirirlər ki, Rusiyanın Çernobıldakı bu uğuru təsadüfi deyil, Kremlin gizli casusların sızması üçün uzun müddət davam edən əməliyyatının bir hissəsidir.
Prezident Vladimir Putinə yaxın hərbi əməliyyatların planlaşdırılması üzrə mütəxəssislər hesab edirdilər ki, bu casusların köməyi ilə Rusiyaya Ukrayna prezidenti Volodimir Zelenskini administrasiyanı tərk etməyə, qaçmağa və ya təslim olmağa məcbur etmək üçün yalnız kiçik bir hərbi qüvvə və bir neçə gün lazım idi.
Jurnalistlər Rusiya və Ukraynada onlarla məmurla müsahibələr aparıb, Ukrayna məhkəmə sənədlərini və Çernobıl AES-də işləyən insanların davranışlarının araşdırılması ilə bağlı bəyanatlarını öyrəniblər. Bildirilir ki, bu məlumatlar onlara sızmanın ictimaiyyətə açıqlanandan daha dərin olduğunu müəyyən etməyə imkan verib.
Ukrayna Milli Təhlükəsizlik və Müdafiə Şurasının katibi Oleksiy Danilov müsahibəsində bildirib ki, işğal zamanı Rusiyanın müdafiə, təhlükəsizlik və hüquq-mühafizə orqanlarında öz casusları olub.
Agentlik Kremlin planlarından birbaşa xəbəri olduğu iddia edilən mənbəyə istinadən yazır ki, rus casusları hələ 2021-ci ildə Çernobılda məmurlara rüşvət vermək və hakimiyyətin itkisiz ələ keçirilməsinə yol açmaq üçün göndərilib. "Reuters" bu iddianın təfərrüatlarını müstəqil şəkildə yoxlaya bilməyib.
"Rusiyanın Çernobıl AES-i ələ keçirməsinə baxmayaraq, Kiyevdə hakimiyyəti ələ keçirmək planı iflasa uğradı. Rusiya və Ukraynadakı çoxsaylı mənbələrə görə, bir çox hallarda Moskvanın təqdim etdiyi "gizli casuslar" bu işi bacarmadı. Ukrayna Təhlükəsizlik Şurasının katibi Danilov deyib ki, casuslar və onların idarəçiləri Ukraynanı zəif hesab edirdilər ki, bu da “tam yanılma” idi", araşdırmada qeyd edilir.
Agentliyin məlumatına görə, Kremlin Ukraynada etibarlı adamları kimi güvəndiyi insanlar işğaldan əvvəlki illərdə öz güclərini olduğundan artıq qiymətləndiriblər. Moskvanın dəstəklədiyi separatçıların rəhbərliyinə yaxın mənbənin jurnalistlərə verdiyi məlumata görə, Kreml planlaşdırmasında “klounlara” arxalanıb, onlar çox şey bilmirlər, lakin həmişə rəhbərliyin eşitmək istədiyini deyirlər, çünki əks halda pulsuz qalacaqlar".
Bununla belə, "Reuters" agentliyinin məlumatına görə, Rusiya kəşfiyyatı bir sahədə uğur qazanıb: Ukrayna daxilində inamsızlıq toxumu səpib və satqınların və işbirlikçilərinin izinə düşmək vəzifəsi daşıyan Ukrayna Təhlükəsizlik Xidmətinin çatışmazlıqlarını ifşa edib.
