Ukrayna prezident aparatının rəhbərinin müşaviri Mixail Podolyak BBC-yə müsahibəsində bildirib ki, müharibədə hər gün 100-200 ukraynalı hərbçi ölür.

Podolyakın sözlərinə görə, itkilərin sayının çox olmasının əsas səbəblərindən biri Ukrayna və Rusiyanın hərbi imkanları arasında paritetin olmamasıdır.

Prezident aparatının nümayəndəsi hesab edir ki, Ukraynaya Rusiyanın atəş gücü ilə paritet əldə etmək və işğal olunmuş əraziləri azad etmək üçün Qərb ölkələrinin təmin edə biləcəyi “yüzlərlə ən güclü artilleriya sistemi” və 300-ə qədər raket sistemi lazımdır.

BBC-nin məlumatına görə, Mixail Podolyakın gündə 100-200 ukraynalı hərbçinin ölümü ilə bağlı məlumatı müharibə başlayandan bəri Ukrayna hökumətinin bildirdiyi gündəlik itkilərin maksimum sayıdır.

İyunun 1-də Ukrayna prezidenti Vladimir Zelenski deyib ki, hər gün döyüş meydanında 60-100 ukraynalı hərbçi ölür, 500-ə yaxın adam yaralanır. İyunun 9-da Ukraynanın müdafiə naziri Oleksey Reznikov bildirib ki, Donbasda hər gün 100-ə qədər hərbçi ölür, 500-ə qədər insan isə yaralanır.

Ukrayna və Rusiya hərbçiləri arasında itkilər barədə davamlı olaraq məlumat vermir. Rusiya Federasiyasının Müdafiə Nazirliyi bu cür məlumatları iki dəfə açıqlayıb, sonuncu dəfə martın 25-də 1351 ölü və 3825 yaralı barədə məlumat verib. Ukrayna prezidenti Volodimir Zelenski aprelin ortalarında müharibə başlayandan bəri 2500-dən 3000-ə qədər ukraynalı hərbçinin həlak olduğunu, daha 10 minə yaxınının isə yaralandığını bildirib.

Rusiyada olduğu kimi Ukraynada da hərbi əməliyyatlar zamanı hərbçilərin itkilərini açıqlamaq qanunla qadağandır. Ukrayna prezident aparat rəhbərinin müşaviri Aleksey Arestoviç bildirib ki, bu cür məlumatlar dövlət sirri təşkil edir və açıqlanması “düşmənə onun hərəkətlərinin effektivliyini qiymətləndirməyə kömək edə bilər”.