Türkiyə hökuməti Finlandiya və İsveçin NATO-ya qəbulu ilə bağlı danışıqların başlamasını bloklayıb. Bu barədə "DPA" agentliyi və "Financial Times" mənbələrə istinadən xəbər verir. Nəşrlərin mənbələrinin sözlərinə görə, mayın 18-də NATO Finlandiya və İsveç səfirlərinin bu ölkələrin alyansa daxil edilməsi üçün təqdim etdikləri ərizələri müzakirə etməyi planlaşdırıb. Lakin Ankaranın mövqeyinə görə danışıqlar başlamayıb. "DPA"-nın "TASS"-a istinadla verdiyi xəbərə görə, Türkiyə tərəfi açıq şəkildə bildirib ki, danışıqların başlamasına indi razılıq verə bilməz. "Financial Times" qeyd edir ki, bu problem baş katib Yens Stoltenberqin daha əvvəl dediyi kimi, NATO-nun Finlandiya və İsveçdən gələn ərizələri nəzərdən keçirmənin ilkin mərhələsində bir-iki həftə ərzində təsdiqləmək imkanlarını şübhə altına alır. Mayın 18-də Brüsseldə Stoltenberq Finlandiya və İsveç səfirlərindən bu ölkələrin hərbi alyansa qoşulması üçün ərizələr alıb. Rusiyanın Ukraynaya müdaxiləsi fonunda hər iki ölkə neytral statusundan imtina etmək qərarına gəlib. Müraciətlərə NATO Şurası tərəfindən baxılmalı və sonra İsveç və Finlandiya arasında üzvlük sazişi alyansın bütün 30 üzv ölkəsi tərəfindən ratifikasiya edilməlidir. Bundan əvvəl Türkiyə prezidenti Rəcəb Tayyib Ərdoğan İsveç və Finlandiyanın alyansa qoşulma planlarında “müsbət” qarşılamadığını bildirib. "Bloomberg"-in məlumatına görə, Türkiyə hökuməti Finlandiya və İsveçin alyansa girişini təsdiqləməyə razılaşacaqları şərtlərin siyahısını təqdim edib. Onların arasında bu ölkələrin Kürdistan İşçi Partiyasının terror təşkilatı kimi tanınması, həmçinin 2019-cu ildə Rusiyadan S-400 sistemlərinin alınması ilə əlaqədar Ankaraya tətbiq edilən məhdudiyyətlərin aradan qaldırılması da var.