Ermənistanın baş naziri Nikol Paşinyan Rusiya Federasiyasının bu ölkədəki fövqəladə və səlahiyyətli səfiri Sergey Kopırkini qəbul edib. Hökumətin mətbuat xidmətinin məlumatına görə, baş nazir son illər Ermənistan-Rusiya müttəfiqlik münasibətlərinin dinamik inkişafını qeyd edib və Rusiyanın Ermənistandakı səfirliyinin bunda töhfəsinin çox böyük olmasını əlavə edib. Nikol Paşinyanın sözlərinə görə, iki ölkənin tərəfdaşları arasında sıx təmaslar mövcuddur ki, bu da əməkdaşlığa yeni təkan vermək üçün vacibdir. Eyni zamanda, Ermənistan hökumətinin başçısı ATƏT-in Minsk Qrupunun həmsədr ölkələrinin səfirləri ilə mütəmadi görüşlərin keçirilməsinin vacibliyini və Dağlıq Qarabağ probleminin həllində bu formatın əhəmiyyətini vurğulayıb. Məlumata görə, Sergey Kopirkin Ermənistanın baş nazirinə səfirliyin fəaliyyətinə verdiyi yüksək qiymətə görə təşəkkür edib və onların məqsədinin ikitərəfli müttəfiqlik və qardaşlıq münasibətlərinin daha da inkişafı üçün mümkün olan hər şeyi etmək olduğunu vurğulayıb. Görüşdə Ermənistan-Rusiya əməkdaşlığının gündəliyi, Dağlıq Qarabağ münaqişəsinin həlli və Cənubi Qafqaz regionunda baş verən proseslərlə bağlı məsələlər müzakirə edilib, Ermənistan hökuməti qeyd edib.