Avstraliya hakimiyyəti Ukraynadakı müharibəyə görə Rusiyaya qarşı sanksiyaları genişləndirib. Bu barədə ölkə hökumətinin saytında məlumat verilib. Dövlət Dumasının 75 deputatı, qondarma “DXR”in 20 naziri və qondarma “LXR”in 12 naziri, həmçinin teleaparıcı Vladimir Solovyov yeni sanksiyalar paketinə daxil edilib. Şəxsi sanksiyalar onlara Avstraliyaya səfər etməyi qadağan edir və onların bu ölkə ərazisindəki aktivləri dondurulur. Aprelin 14-də Avstraliya hakimiyyəti Rusiyanın Ukraynada başlatdığı müharibəyə görə bir sıra rus şirkətlərinə qarşı tətbiq etdiyi sanksiyaları genişləndirib. Siyahıya Qazprom, Rusiya Dəmir Yolları, Sogaz, KamAZ, Qazpromneft, Transneft, Alrosa, Rostelecom və daha altı Rusiya hüquqi şəxs əlavə edilib. Fevralın 24-də Rusiya qoşunlarının Ukraynaya daxil olmasından sonra Avstraliya Rusiyaya qarşı sanksiyalar tətbiq etməyə başlayan ilk ölkələr sırasında olub. Hakimiyyət prezident Vladimir Putin, xarici işlər naziri Sergey Lavrov, müdafiə naziri Sergey Şoyqu, baş nazir Mixail Mişustin və başqalarının ölkəyə girişinə qadağa qoyub.Sanksiya siyahısında ümumilikdə 67 rus var idi. Avstraliya da Rusiyadan dəbdəbəli malların bu ölkəyə ixracına qadağa qoyub və Rusiyaya alüminium oksidi və alüminium filizlərinin ixracına qadağa var. Buna cavab olaraq Rusiya bu ölkəni “qeyri-dost” kimi tanıyıb. Ölkənin Xarici İşlər Nazirliyi Avstraliya və Yeni Zelandiyanın baş nazirləri üçün Rusiya Federasiyasına girişi bağlayıb, həmçinin Avstraliyadan 228 siyasi xadimi və Yeni Zelandiyadan 130 siyasi xadimi qara siyahıya salıb.