ABŞ prezidenti Co Baydenin administrasiyası Rusiyadan yüksək ixtisaslı mütəxəssisləri bəzi viza məhdudiyyətlərini aradan qaldırmaqla öz tərəfinə çəkmək niyyətindədir. Bu barədə ˝Bloomberg˝ xəbər verir. Agentliyin mənbələri bildirirlər ki, Ağ Ev Konqresə ABŞ-ın Rusiyadan iş vizası almaq üçün müraciət edən bəzi şəxslərin məşğulluq sübutunu tələb etməkdən azad edilməsini təklif edib. ABŞ hakimiyyəti təklifi ABŞ-da və ya xaricdə elm, texnologiya, mühəndislik və ya riyaziyyat üzrə magistr və ya doktorluq dərəcəsi almış Rusiya vətəndaşlarına şamil etmək niyyətindədir. Xüsusilə, Bayden administrasiyası yarımötürücülər, kosmik texnologiya, kibertəhlükəsizlik, qabaqcıl texnologiya və kompüter sistemləri, nüvə texnologiyası, süni intellekt, raket mühərrikinin inkişafı sahəsində təcrübəsi olanların ABŞ-a köçməsini asanlaşdırmaq istəyir. ABŞ Prezidenti yanında Milli Təhlükəsizlik Şurasının sözçüsü agentliyə bildirib ki, bu səylər qısa müddətdə Rusiyanın yüksək texnologiya resurslarını zəiflətmək, uzunmüddətli perspektivdə isə innovasiya bazasını sarsıtmaq, eyni zamanda ABŞ iqtisadiyyatını və milli təhlükəsizliyini gücləndirmək məqsədi daşıyır. Ağ Evdən ˝Bloomberg˝ə bildirilib ki, Rusiyanın Ukraynaya təcavüzü başlayandan bəri çoxlu yüksək ixtisaslı mütəxəssis Rusiyanı tərk edib. Bayden administrasiyası bunu ABŞ və digər ölkələrin “sanksiyalarının yaratdığı məhdud maliyyə imkanları” ilə əlaqələndirib. Çikaqo Universitetinin iqtisadçısı Konstantin Sonin martın 8-də müxtəlif ölkələrin statistikasına əsaslanaraq bildirib ki, “son 10 gündə 200 mindən çox insan Rusiyanı tərk edib”. Rusiya Elektron Rabitə Assosiasiyası (RAEC) martın 22-də bildirib ki, 50-70 min İT mütəxəssisi Rusiyanı tərk edib, apreldə isə daha 70-100 min nəfərin ölkəni tərk edəcəyi gözlənilir. Ukraynaya işğalın başlanmasından qısa müddət sonra Rusiya hakimiyyət orqanları Rusiyanın İT mütəxəssislərinə hərbi xidmətə çağırışdan möhlət veriləcəyini, İT şirkətlərinin isə gəlir vergisi və yoxlamalardan azad ediləcəyini açıqlayıb.