Avstraliya və Yaponiya Rusiyanın Ukraynaya hərbi müdaxiləsinə görə yeni sanksiyalar tətbiq edib. Bu barədə iki ölkənin rəsmi orqanları məlumat yayıb. Avstraliya “Rusiya təbliğatçıları və dezinformasiya yayanları” qara siyahıya salıb. Bu siyahıda 22 nəfər var, xüsusən də RT-nin baş redaktoru Marqarita Simonyan, teleaparıcılar Tiqran Keosayan və Olqa Skabeeva sanksiyalara məruz qalıb. Ümumilikdə Avstraliya Rusiyaya qarşı 500-ə yaxın sanksiya tətbiq edib. Bundan əlavə, Avstraliya Xarici İşlər Nazirliyi Belarusa qarşı yeni sanksiyalar elan edib: Aleksandr Lukaşenko, onun həyat yoldaşı Qalina və oğlu Viktora məhdudiyyətlər qoyulub. “Prezident Lukaşenkonun başçılıq etdiyi Belarus hökuməti Ukraynanın suverenliyi və ərazi bütövlüyünə hücumda Rusiyaya və onun silahlı qüvvələrinə strateji dəstək verməyə davam edir”, - Avstraliyanın xarici işlər naziri Maris Peyn bildirib. Yaponiya isə Putinin mətbuat katibi Dmitri Peskov, onun həyat yoldaşı Tatyana Navka və onların uşaqları Yelizaveta və Nikolay da daxil olmaqla 80 şirkət və 25 şəxsə qarşı sanksiya tətbiq edib. Siyahıda Rusiya Federasiyası Təhlükəsizlik Şurasının katibi Nikolay Patruşev və Rusiya Prezident Administrasiyası rəhbərinin birinci müavini Sergey Kiriyenkonun qohumları da var. Şirkətlərin sanksiya siyahısına aşağıdakılar daxildir: Miass Avtomobil Zavodu, Vımpel gəmiqayırma zavodu, Amur Gəmiqayırma Zavodu, Baykal Electronics elektronika istehsalçısı, Strela istehsalat kompleksi, Zvezda maşınqayırma zavodu və başqaları. Ümumilikdə Rusiyadan 101 soyad və 130 təşkilat var.