O, ölkənin ərazi bütövlüyünə və toxunulmazlığına qəsddə ittiham olunur

Ukrayna Təhlükəsizlik Xidməti (UTX) Rusiyanın keçmiş prezidenti Dmitri Medvedevi axtarışa verib. O, “hakimiyyət nümayəndəsi tərəfindən ölkənin ərazi bütövlüyünə və toxunulmazlığına qəsd” maddəsi ilə axtarışa verilib.

Ukrayna Daxili İşlər Nazirliyindən bildirilib ki, hazırda Rusiya Təhlükəsizlik Şurasının sədr müavini vəzifəsini tutan siyasətçi ibtidai istintaq çərçivəsində axtarışdadır.

Ona təyin olunan maddə üzrə ən yüksək cəza əmlakı müsadirə olunmaqla on ilədək azadlıqdan məhrumetmədir.

Medvedev hələ ki, Ukrayna Təhlükəsizlik Xidmətinin qərarını şərh etməyib.

Rusiya Xarici İşlər Nazirliyinin rəsmi nümayəndəsi Mariya Zaxarova, Baş prokuror İqor Krasnov və İstintaq Komitəsinin rəhbəri Aleksandr Bastrıkin istisna olmaqla, Dövlət Dumasının deputatları və hüquq-mühafizə orqanlarının rəhbərləri də axtarışa verilib.