Ukraynanın beşinci prezidenti Pyotr Poroşenko bazar ertəsi, yanvarın 17-də xaricdən haqqında dövlətə xəyanətdə şübhəli bilinən iş üzrə həbs-qətimkan tədbiri seçilən Ukraynaya qayıdıb. Siyasətçinin təxminən 1000-1500 tərəfdarı hava limanının yaxınlığında toplaşıb. Bu barədə “Ukrayinskaya Pravda” yazır. Pasport nəzarəti zamanı Poroşenkoya Ukrayna Dövlət Təhqiqat Bürosunun müstəntiqləri yaxınlaşıb və ona dövlətə xəyanət və terrora köməklik ittihamı ilə çağırış vərəqəsi verməyə cəhd ediblər. Poroşenko çağırış vərəqəsini qəbul etməkdən imtina edib. Poroşenkonun pasportu götürülüb, bundan sonra keçmiş prezident onun Ukrayna ərazisinə buraxılmadığını bildirib. Tezliklə pasportu ona qaytarılıb və o, hava limanında nəzarətdən keçib. Poroşenko Ukraynaya qayıtmazdan bir müddət əvvəl “Levıy bereq” nəşri keçmiş prezidentlə müsahibəni yayımlayıb. "Birincisi, mən həbsə düşməyəcəyəm" Poroşenko bildirib. “İkincisi, mən həbs olunmağıma icazə verməyəcəyəm. Mən Timoşenko deyiləm. Üçüncü mövqe ondan ibarətdir ki, mən Ukraynanı qorumaq üçün mümkün qədər səmərəli fəaliyyət göstərəcəyəm. Özümü müdafiə etməklə, Ukraynanı müdafiə etdiyimə qəti şəkildə inanıram”. 2021-ci ilin dekabrında Poroşenko “2014-2015-ci illərdəki hərbi qarşıdurma zamanı” özünü müstəqil elan etmiş Donetsk və Luqansk Xalq Respublikalarından kömür tədarükü ilə bağlı başlanmış vətənə xəyanətlə bağlı cinayət işində şübhəli bilinib. Poroşenko bütün ittihamları rədd edib. Dekabrda müstəntiqlər Poroşenkoya dindirilməsi üçün çağırış vərəqəsi vermək istəyəndə o, onlardan uzaqlaşaraq naməlum istiqamətə gedib. Daha sonra onun “Avropa Həmrəyliyi” partiyasından Poroşenkonun planlaşdırılmış görüşlərdən və qısamüddətli məzuniyyətdən sonra Ukraynaya qayıdacağı bildirilib. Yanvarda Kiyev məhkəməsi işin istintaqı çərçivəsində Poroşenkonun əmlakına, o cümlədən Vinnitsa və Kiyevdəki mənzillərinə, həmçinin Kozindəki mülklərinə həbs qoyub. Kömür tədarükü işində “Müxalifət Platforması - Həyat Naminə” partiyasının rəhbəri, media tərəfindən “Putinin xaç atası” adlandırılan Viktor Medvedçuk və Ukraynanın keçmiş energetika naziri Volodimir Demçişin də şübhəli bilinir.