1990-cı illərdə əsirlikdə olan azərbaycanlılara işgəncə verməkdə suçlanan iki nəfər Ermənistan vətəndaşı - Lüdvik Mkrtiçyan və Alyoşa Xosrovyanın mühakiməsi yekunlaşıb. Avqustun 2-də Yasamal Rayon Məhkəməsinin inzibati binasında onlara hökm oxunub. Bakı Hərbi Məhkəməsinin hökmü ilə onların hər biri 20 il azadlıqdan məhrum edilib. Hökmdə yazılıb ki, onlar cəzalarının birinci yarısını qapalı həbsxana rejimində, qalanını ciddi rejimli cəzaçəkmə müəssisəsində çəkməlidir. Bununla Azərbaycanda mühakimə olunan ermənilərin məhkəməsi başa çatıb. Ermənistan tərəfi Azərbaycanda mühakimə olunan vətəndaşlarının hərbi əsir olduğunu bildirir. Ombudsmanı Arman Tatoyan deyib ki, hərbi əsirlərin hər hansı formada mühakimə olunması beynəlxalq hüququn kobud şəkildə pozulmasıdır. Azərbaycan isə onları hərbi əsir deyil, terrorçu-diversant sayır. Amma onların bir qismi sonradan mina xəritələri qarşılığında azad olunub.