Bu gün Müsavat partiyası Rusiyanın Azərbaycandakı səfirliyinin qarşısında piket keçirib. 

Bir qrup partiya fəalı Rusiya əleyhinə müxalif şüarlarla səfirlik binasına yaxınlaşıblar. Onlar Rusiyanın Qarabağdakı fəaliyyətinə etiraz ediblər və Azərbaycan ərazilərinə atılan "İskəndər" raketi ilə bağlı hesabat istəyiblər.

Səfirlikdən isə fəalların qətnaməsini qəbul edəcək rəsmi şəxslərin olmadığı bildirilib. Partiya fəalları piketin qətnaməsini səfirliyin binasının önündə oxuyublar və aksiyanı baş tutmuş elan ediblər.

Onlar polisin müşayəti ilə ərazini tərk ediblər.

Aprelin 2-də Azərbaycan Ərazilərinin Minalardan Təmizlənməsi Agentliyi (ANAMA) Dağlıq Qarabağ ərazisində “İskəndər” raketlərinin qalıqlarının tapıldığını açıqlayıb. Parçaların Şuşa şəhərində 15 mart 2021-ci il tarixində ərazilərin minalardan təmizlənərkən tapıldığı qeyd olunub. Daha sonra KİV-də raketlərin quyruq hissələrini və işarələri olan parçaları göstərən fotolar yayımlanıb.

25 fevralda Rusiya Müdafiə Nazirliyi “İskəndər” OTRK-nın Dağlıq Qarabağdakı hərbi münaqişə zamanı istifadə olunmadığını bildirmişdi. Şöbə nümayəndəsi raketlərin hamısının Ermənistanın hərbi anbarlarında olduğunu qeyd etmişdi.

Dmitri Peskov isə daha öncə verdiyi açıqlamada Kremlin Şuşaya “İskəndər”in atılması xəbərindən məlumatsız olduğunu bildirmişdi.