"Natanz nüvə bazasında baş verən partlayış və nüvə alimimiz Muhsin Fahrizadenin qətlə yetirilməsi göstərdi ki, təhlükəsizlik məsələlərində ciddi boşluqlarımız var"

Bu sözləri İranın ali dini lideri Ayətullah Əli Xameneyinin köməkçisi Muhsin Rezai deyib.

Muhsin Rezai bildirib ki, İranın bütün nüvə arxivi ələ keçirilib, buna görə də təhlükəsizlik tədbirləri gücləndirilməlidir. O bildirib ki, Natanz nüvə bazasında baş verən partlayış İranı sarsıdıb.

Bundan əvvəl İranda nüvə bazasında partlayış olub. İran partlayışda İsraili günahlandırıb: "İsrail hədəflərinə çatmayacaq. İranın nüvə bazasına hücuma görə İsraildən qisas alacağıq"

Bu sözləri İranın xarici işlər naziri Məhəmməd Cavad Zərif Vyana görüşləri ilə əlaqədar təşkil olunan Milli Təhlükəsizlik Komissiyasının iclasında danışarkən deyib.

Zərif bildirib ki, Amerikanın sanksiyaları qaldırmaq yolu ilə bağlı İranın atdığı uğurlu addımlarından sonra İsrail bu hücumla qisas almaq istəyib: “İsrail siyasətçiləri və hərbçiləri açıq şəkildə bildirirlər ki, onlar nüvə danışıqları ilə bağlı irəliləməyə və ədalətsiz sanksiyaların ləğvinə imkan verməyəcəklər. Bu gün onlar öz məqsədlərinə çatdıqlarını düşünürlər”, - deyə İran XİN başçısı vurğulayıb.

İran Xarici İşlər Nazirliyinin sözçüsü Səid Xətibzadə isə bildirib ki, İran vaxtı çatanda İsraildən intiqam alacaq. O, hadisə nəticəsində istismardan çıxarılan bütün sentrifuqaların "IR1" olduğunu və onların yeni sentrifuqalarla əvəz ediləcəyini deyib.