Fevralın 18-də Avropa İnsan Hüquqları Məhkəməsi (AİHM) Azərbaycandan göndərilən 4 şikayət üzrə qərarını açıqlayacaq. Bu barədə hüquqşünas Xalid Ağəliyev bildirib. Onun sözlərinə görə, şikayətlərdən ikisi NİDA Vətəndaş Hərəkatının fəalları Məmməd Əzizov və Şahin Novruzludan daxil olub. Şikayətlər məhkəməyə qədərki ilkin rəy və onun uzadılması ilə bağlıdır. Onlar azadlıq hüququnun pozulmasının və təqib edilmələrinin siyasi motivli olmasının tanınmasını xahiş edirlər. 6 may 2014-cü il tarixində Bakı Ağır Cinayətlər Məhkəməsi  NİDA-nın  fəalını kütləvi iğtişaşların təşkili, qanunsuz silah və narkotik maddə dövriyyəsində ittiham  edərək  6 ildən 8 ilədək həbs cəzasına məhkum edib. 2016-cı ildə M.Əzizov və Ş.Novruzlu prezidentin fərmanı ilə əfv ediliblər. Amnesty İnternational fəalları "vicdan məhbusu" adlandırıb. Fevralın 18-də AİHM-in elan edəcəyi daha bir qərar Sabunçu rayonunun 18 sakininin əmlak hüquqlarının pozulmasına aiddir. Bundan əlavə, vətəndaş İlqar Feyzov məhkəmə qərarı olmadan bir neçə gün qanunsuz həbsdə saxlanmasından şikayət edib