Yaponiya hökuməti dekabrın 16-da Çin dəniz polisinin dörd patrul gəmisinin Tokionun ərazi suları hesab etdiyi mübahisəli Senkaku (Diaoyu) adaları yaxınlığındakı zonaya daxil olmasına görə Çin hakimiyyətinə etiraz göndərib. Bu barədə Yaponiya Nazirlər Kabinetinin baş katibi Hirokazu Matsuno mətbuat konfransında bildirib. “Çin gəmilərinin bizim ərazi sularımıza daxil olması beynəlxalq hüquq normalarına ziddir, bununla bağlı biz diplomatik kanallar vasitəsilə etirazımızı bildirmişik. Bu cür hadisələr təəssüf doğurur və qəbuledilməzdir. Biz Senkaku adalarına nəzarət üçün lazımi səyləri davam etdirmək və bu məsələdə Çin hakimiyyəti ilə sakit və möhkəm qarşılıqlı fəaliyyət niyyətindəyik”, - deyə o bildirib. Senkaku adaları ilə bağlı mübahisə Tokionun 2012-ci ilin sentyabrında Yaponiya vətəndaşı olan özəl sahiblərdən onu alacağını elan etməsindən sonra kəskinləşdi. Bundan sonra Çində yapon restoranlarının və müəssisələrinin dağıdılması ilə müşayiət olunan kütləvi etiraz aksiyaları keçirilib. O vaxtdan Çin gəmiləri mübahisəli arxipelaqın yaxınlığında daim gəzir və onun sahil zonasında nümayişkaranə səfərlər edir.