Danimarka hakimiyyəti ölkənin penitensiar sistemdəki yükünü azaltmaq üçün Kosovoda 300 həbsxana kamerasını icarəyə götürməyi planlaşdırır. Oraya Danimarka həbsxanalarında cəza çəkən və deportasiyaya məhkum edilmiş əcnəbi cinayətkarların göndərilməsi nəzərdə tutulur. Krallığın parlamentindəki siyasi çoxluğunun təsdiq etdiyi layihənin hədəfi 2025-ci ilə qədər həbsxana yerlərinin sayını min nəfər artırmaqdır. "Düşünürəm ki, probasiya xidmətinin hazırda olduğu fəlakətli vəziyyətlə bağlı nəsə etməliyik. Yer çatışmazlığı var. Bu isə konkret problemi həll edir. Bizdə fövqəladə vəziyyətdir və bu 300 yer yükü azaltmağa kömək edəcək", Sosialist Xalq Partiyasının sözçüsü Karina Lorenzen Denhardt deyib. Son bir il ərzində Danimarka Ədliyyə Nazirliyi kosovalı hakimiyyət orqanları ilə danışıqlar aparıb. Müqavilə imzalanmazdan əvvəl daha bir neçə görüş keçiriləcək. Ümumilikdə, Danimarka cəza sisteminin gücləndirilməsi tədbirləri Xəzinədarlığa 500 milyon avrodan çox başa gələcək.