Riqa məhkəməsi jurnalist və siyasi fəal Yuri Alekseyevi bir il iki ay müddətinə azadlıqdan məhrum edib. Bu barədə Delfi xəbər verir. Alekseyevə qarşı cinayət işi 2017-ci ildə açılıb. Jurnalist milli, etnik və ya irqi nifrət salmaqda, qanunsuz olaraq tapança patronu saxlamaqda və uşaq pornoqrafiyasını yaymaqda ittiham olunub. Yuri Alekseyevin özü isə iddia edib ki, o, yazmadığı "latviyalıları öldürmək" məzmunlu şərhlərinə görə ittiham olunur. Jurnalistin sözlərinə görə, güllələr qəsdən qoyulub, həmçinin müstəntiq onun çimən övladlarının fotoşəkillərini uşaq pornoqrafiyası adlandırıb. “Rusiya KİV-ləri ilə əməkdaşlıq edən və internetdə “aktiv” olan çoxlu rusiyalı jurnalistlərimiz var. Onları qorxutmaq lazımdır. Necə qorxutmaq olar? Yaxşı, gəlin, Alekseyevi həbs edək, onda hamı qorxacaq”. Jurnalist hakimin onun vəkilinin arqumentlərini nəzərə almadığını və bütün prosesin siyasi motivli olduğunu bildirib. Alekseev apellyasiya şikayəti verməyi planlaşdırır. Delfi Yuri Alekseyevi Latviyanın ən məşhur rusdilli jurnalist və redaktorlarından biri kimi qeyd edir. 1990 və 2000-ci illərdə “Business & Baltia”, 2Kommersant Baltic” və “Business.lv” jurnallarının baş redaktoru olub. 2005-2009-cu illərdə Yuri Alekseev "Vahid Latviyada İnsan Hüquqları Uğrunda" (ZaPCHEL) birliyindən Riqa Şəhər Şurasının deputatı olub. 2014-cü ildə birlik "Rusiya Latviya İttifaqı" adlandırılıb. Hazırda Yuri Alekseev “Imhoclub.lv” saytının baş redaktorudur. Latviya Təhlükəsizlik Polisi öz hesabatlarında bu saytın “Rusiyanın Latviyada informasiya təsirinin gücləndirilməsində müəyyən rol oynadığını” yazıb.