Türkiyədə prezident və parlament seçkilərində səsvermənin nəticələri açıqlanmağa başlayıb.

Hələlik Receb Tayyip Erdoğan və AKP ilə MHP-nin qurduğu Cumhur ittifaqı irəlidədir.

Nəticələrlə buradan tanış ola bilərsiz.

***

Türkiyədə növbədənkənar prezident və parlament seçkiləri başa çatıb.

Anadolu agentliyi ədliyyə naziri Əbdülhəmid Gülə istinadla xəbər verir ki, səsvermə zamanı ciddi insidentlər olmayıb. Hazırkı dövlət başçısı, hakim partiyanın namizədi də bunu bildirib.

Amma müxalifət seçki saxtakarlıqlarının olduğunu deyir. Ölkənin cənub şərqində qutuya top bülleten atılması ilə bağlı iddialar var.

Mərkəzi Seçki Komissiyası günün sonuna ilkin nəticələri elan edə bilər. İlk olaraq prezident seçkilərinin nəticələri sayılır.

***

Bu gün Türkiyədə növbədənkənar prezident və parlament seçkiləri keçirilir.

Yerli vaxtla saat 8-də başlayan seçkilər saat 17-də başa çatacaq.

Prezidentlik uğrunda 6 şəxs mübarizə aparır. Bunlar Türkiyənin hazırkı prezidenti Receb Tayyib Erdoğan, Cümhuriyyət Xalq Partiyasının (CHP) namizədi Meherrem İnce, İyi Partiyanın sədri Meral Akşener, Seadət Partiyasının sədri Temel Karamollaoğlu, Vətən Partiyasının sədri Doğu Perinçek və Xalqların Demokratik Partiyasının (HDP) həbsdə olan namizədi Selaheddin Dəmirtaşdır.

Parlament seçkilərində mübarizə aparacaq siyasi qüvvələr isə hakim Ədalət və İnkişaf Partiyası (AKP), Milliyətçi Hərəkat Partiyası (MHP), Böyük Birlik Partiyası (BBP), CHP, İYİ Partiya, Səadət Partiyası, Demokratik Partiya, Xalqların Demokratik Partiyası, Müstəqil Türkiyə Partiyası, Müstəqil Mübarizə - HÜDA Partiyası, Vətən Partiyasıdır. AKP və MHP parlament seçkilərinə birgə blokda – “Cümhur ittifaqın”da qatılacaq. BBP namizədləri isə “Cümhur ittifaqın”da AKP namizədləri qismində yer alıb. CHP, İyi Partiya, Səadət Partiyası və Demokratik Partiya isə parlament seçkilərinə “Millət ittifaqı”nda birləşiblər.

Türkiyədəki 59 milyon 391 min 328 vətəndaş səsvermə hüququna malikdir.