Azərbaycanda bir müddət əvvəl ləğv edilən cəza növü yenidən bərpa edilir. Bununla bağlı prezident İlham Əliyevin təqdimatı ilə Milli Məclisə təklif göndərilib. Bu barədə APA xəbər yayıb.
Məlumata görə, Cinayət Məcəlləsinə yeni 52.1 - azadlığın məhdudlaşdırılması madəsinin əlavə edilməsi təklif olunur.
Yeni maddənin mahiyyəti məhkumun cəmiyyətdən tam təcrid olunmadan yaşayış yeri üzrə nəzarət altında saxlanmaqla azadlıq hüququnun məhdudlaşdırılmasından ibarətdir.
Təklifə görə, azadlığın məhdudlaşdırılması cəzasına məhkum edilmiş şəxsə aşağıdakı tələblər qoyulur:
- yaşayış yerini tamamilə və ya günün müəyyən vaxtlarında tərk etməmək;
- elektron nəzarət vasitəsini gəzdirmək və həmin vasitənin işlək vəziyyətdə saxlanması üçün ona xidmət etmək;
- məhkəmənin müəyyən etdiyi ərazi hüdudlarını tərk etməmək;
- cəzanın icrasına nəzarət edən orqanın razılığı olmadan yaşayış yerini dəyişməmək, habelə həmin orqanı iş və ya təhsil yerinin dəyişdirilməsi barədə əvvəlcədən məlumatlandırmaq.
Maddəyə görə məhkəmə məhkum üçün aşağıdakı vəzifələri müəyyən edə bilər:
- kütləvi və digər tədbirlər təşkil etməmək və ya belə tədbirlərdə iştirak etməmək;
- alkoqolizmdən, narkomaniyadan, toksikomaniyadan və ya zöhrəvi xəstəliklərdən müalicə kursu keçmək.
Qanun qəbul edilərsə, azadlığın məhdudlaşdırılması cəzasının sanksiyası 6 aydan 5 ilədək olacaq.
Qanun layihəsində deyilir ki, məhkəmənin müəyyən etdiyi vəzifələri mütəmadi və ya qərəzli şəkildə yerinə yetirməkdən boyun qaçıran məhkumun cəzası azadlıqdan məhrum etmə ilə əvəz ediləcək.
Bu zaman məhkumun cəzasını çəkilməmiş hissəsi cəzanın icrasına nəzarət edən orqanın təqdimatı əsasında məhkəmə tərəfindən müəyyən müddətə azadlıqdan məhrum etmə növündə cəza ilə əvəz edilir. Müddət isə iki gün azadlığın məhdudlaşdırılması bir gün azadlıqdan məhrum etmə ilə hesablanır.
Azadlığın məhdudlaşdırılması cəza növü 2011-ci ildə ləğv edilib və o vaxta qədər tamam başqa formatda olub.
Dəyişikliklər layihəsi yaxın günlərdə ictimai dinləmələrdən sonra Milli Məclisdə müzakirəyə çıxarılacaq.
