İngiltərə millisinin və paytaxt “Çelsi” klubunun sabiq futbolçusu John Terry karyerasını "Aston Villa"da davam etdirəcək.

ESPN-nin məlumatına görə, 36 yaşlı mərkəz müdafiəçisi İngiltərə çempionatının I divizionunda mübarizə aparan Birminqem təmsilçisi ilə razılıq əldə edib.

Müqavilənin müddəti bir illikdir. Təcrübəli futbolçu bu müddətdə 3 milyon funt-sterlinq qazanacaq.

Tarixçə

“Vest Hem”in yetirməsi olan John Terry 1995-ci ildə “Çelsi”yə transfer olunub. O, 1998-ci ildən etibarən London klubun əsas komandasında çıxış etməyə başlayıb və yalnız 2000-ci ildə icarə əsasında “Nottingem Forest”in formasını geyinib.

Mərkəz müdafiəçisi 2016-2017 mövsümünün sonunda müqaviləsinin müddəti başa çatdığı üçün “zadəganlar”dan ayrılıb.

John Terry kapitanı olduğu “Çelsi” ilə 5 dəfə İngiltərə çempionu, 3 dəfə İngiltərə Kubokunun qalibi olub. O, 2012-ci ildə paytaxt təmsilçisi ilə Çempionlar Liqasını qazanıb.