“Oğlum baxımsızlığın və həkim naşılığının qurbanı oldu. Həkimlərə pul verirdik ki, uşağa diqqət göstərsinlər. Bununla belə, onu öldürdülər”.

Bakı sakini Sabit Əliyev AzadlıqRadiosu-na danışır ki, 8 yaşlı oğlu Emin bu il martın 11-də hər iki ağ ciyərin səpələnmiş vərəmi diaqnozu ilə müalicə aldığı Elmi Tədqiqat Ağ Ciyər Xəstəlikləri İnstitutunda vəfat edib. Ata balaca Eminin ölümündə həkimləri günahlandırır.

Əvvəlcə heç bir problemi olmadığını bildirib

Emin ailənin yeganə övladı olub. Ata hesab edir ki, o, həkim qeyri-peşəkarlığının və səhlənkarlığının qurbanıdır.

Sabit Əliyevin sözlərinə görə, oğlu 7 saylı uşaq poliklinikasında qeydiyyatda olub. Bu ilin fevralında sağlam, səhhətindən şikayət olmayan uşağın vəziyyəti dəyişib. Fevralın 19-da valideynləri onu qeydiyyatda olduğu poliklinikaya aparıblar. Oradan müayinə üçün 5 saylı vərəm əleyhinə dispanserə göndərilib. Rentgen müayinəsindən sonra valideynlərə uşağın səhhətində heç bir problem olmadığı bildirilib. Ata danışır:

“Bundan sonra 7 saylı uşaq poliklinikasındakı sahə həkimi Eminə öskürəyə görə müalicə yazdı. Müalicə almasına baxmayaraq, uşağın durumu günbəgün ağırlaşırdı. Bu dəfə onu “Optimed” klinikasına apardıq. Müayinə edib ağ ciyərin iki tərəfli prosesi diaqnozu qoydular. Analizlərin cavabını götürüb 5 saylı vərəm əleyhinə dispanserə getdim.

Dedim, ‘siz bu uşağı müayinələrdən necə sağlam çıxartmısız ki, uşağa səpələnmiş vərəmin olması barədə diaqnoz qoyulub?’ Əvvəl dedilər, ‘ola bilməz, uşaq sağlamdır’. Sonra da pərt olmasınlar deyə, yalandan müayinə edib dedilər, ‘hə, uşaqda həqiqətən də bu xəstəlik varmış’”.

“200 qram qanı bizə 300 manata satdılar”

Sabit Əliyevə övladının Elmi Tədqiqat Ağ Ciyər Xəstəlikləri İnstitutunda müalicəsi üçün göndəriş verilib. Onu xəstəxananın uşaq şöbəsinə yerləşdiriblər:

“Elə ilk gündən həkimlərə pul paylamağa başladıq. Bircə istədiyimiz o idi ki, uşağa qarşı diqqətli olsunlar. Ancaq həkim etinasızlığı nəticəsində uşağın vəziyyəti gündən günə pisləşdi. Səhhətində yaxşılığa doğru irəliləyiş yox idi, əksinə, hər gün bir az da ümidsizlənirdik. Nə edəcəyimizi bilmirdik.

Hətta şöbə müdirinə dəfələrlə uşağın vəziyyətinin ağır olduğunu dedik, yalvardıq ki, uşağın həyatını xilas etsinlər. Biz hər dəfə yalvardıqca, onlar bizdən pul qopartdılar. Şöbə həkimi dedi, ‘200 qram qan lazımdır’, qan bankından o qanı bizə gətirib 300 manata satdılar”.

“Valideynləri razı olmayıb”

Martın 11-də uşaq vərəm əleyhinə 4 saylı dispanserə göndərilib. Orada müayinə olunub və meningit olmadığı bildirilib. Müalicənin davam etməsi üçün uşaq Elmi Tədqiqat Ağ Ciyər Xəstəlikləri İnstitutuna qaytarılıb. Ata deyir, balaca Emin elə həmin gün həmin Xəstəxanada dünyasını dəyişib. Ata hesab edir ki, 8 yaşlı övladı səhv diaqnozların və səhv müalicələrin qurbanı olub.

Elmi Tədqiqat Ağ Ciyər Xəstəlikləri İnstitutundan AzadlıqRadiosu-na bildirilib ki, 8 yaşlı Emin Əliyev bu il martın 7-də İnstituta ağır vəziyyətdə qəbul edilib. Ona “ağ ciyərlərin milyar vərəmi” diaqnozu qoyulub. Xəstədə meningitə şübhələr olduğu üçün o, 4 saylı vərəm əleyhinə dispanserə müayinəyə göndərilib.

Dispanserin həkimi xəstənin vəziyyətinin ağırlığı ilə əlaqədar onu punksiya etmək istəsə də, valideynləri razı olmayıb. Ona görə də xəstəni stasionar müalicənin davam etməsi üçün İnstituta qaytarıblar. Xəstə İnstituta valideynləri tərəfindən ağır vəziyyətdə və gec gətirildiyindən müalicələr nəticəsiz olub.

“Cinayət tərkibi yoxdur”

Uşağın ölümündən sonra valideynlər həkimlərdən Nizami rayon prokurorluğuna şikayət ediblər. İnstitutun uşaq şöbəsinin müdiri Səbinə Məmmədova prokurorluqda verdiyi izahatda qana görə pul alınması ilə bağlı deyilənlərə belə münasibət bildirilib:

“... Xəstənin müalicəsi ilə bağlı xəstənin valideynlərindən və başqa qohumlarından pul tələb olunmayıb. Martın 10-da valideynlər Qanköçürmə İnstitutuna göndəriliblər ki, onlardan götürülən qanın əvəzinə xəstə üçün qan göndərilsin. Lakin martın 11-də Eminin səhhəti ağır olduğu üçün qan köçürülməsinə icazə verilməyib və valideynlərdən qan götürülməyib. Bəzi dərmanlar şöbədə olmadığından valideynlərin təklifi ilə özləri alıb veriblər”.

Nizami rayon prokurorluğu balaca Eminin ölümü ilə əlaqədar valideynlərin verdiyi şikayət əsasında bir sıra həkimləri dindirib. Lakin nəticədə müstəntiq cinayət işinin başlanmasının rədd edilməsi haqqında qərar çıxarıb. Müstəntiq hesab edib ki, həkimlərin əməllərində cinayət tərkibi yoxdur.

Gözüyaşlı valideynlər müstəntiqin qərarından şikayət veriblər.