Prezident İlham Əliyev Rusiya Federasiyasının “Zavtra” qəzetinin baş redaktoru, yazıçı Aleksandr Proxanovu qəbul edib.

Abzas.net prezidentin mətbuat xidmətinə istinadən xəbər verir ki, İlham Əliyev Rusiyanın “Zavtra” qəzetinin baş redaktoru Aleksandr Proxanovun Azərbaycana səfərinin səmərəli və maraqlı olacağına ümidvar olduğunu bildirib.

Məlumata görə, Aleksandr Proxanov görüşdə Heydər Əliyevdən də danışıb, onunla görüşlərini xatırladıb.

Qonaq Azərbaycana gəlişindən məmnunluq hissi keçirdiyini qeyd edərək, regionlara səfər etdiyini və ölkədəki inkişaf proseslərinin onda dərin təəssürat yaratdığını vurğulayıb.

Görüşdə Azərbaycanla Rusiya arasında ikitərəfli münasibətlərin müxtəlif sahələrdə uğurla inkişaf etdiyi qeyd olunub.

Humanitar sahədə əməkdaşlığımızın genişləndirilməsində Azərbaycan və Rusiya ziyalılarının əlaqələrinin rolu vurğulanıb, əməkdaşlığın perspektivləri ətrafında fikir mübadiləsi aparılıb.