Xarici İşlər Nazirliyinin mətbuat xidmətindən "Report"a verilən məlumata görə, nazirliyin Beynəlxalq İnkişafa Yardım Agentliyi (AİDA) vasitəsilə 4 Afrika ölkəsinə BMT-nin xətti ilə yardım göndərib.

Məlumata görə, Somali, Yəmən, Cənubi Sudan və Nigeriyanın şimal-şərq hissəsində yaranan humanitar böhran ilə bağlı qida çatışmazlığından əziyyət çəkən insanlara 50.000 ABŞ dolları məbləğində yardım göstərilib.

Azərbaycan tərəfindən edilən bu yardım BMT baş katibi Antonio Quterreşin müraciəti əsasında həyata keçirilib. BMT-nin baş katibinin müraciətində aclıq təhlükəsi ilə üzləşən 20 milyondan çox insana, xüsusilə azyaşlı uşaqlara və qadınlara dəstək göstərilməsi və bu humanitar böhranın aradan qaldırılması üçün qeyd olunan dövlətlərlə əlaqələndirilmiş şəkildə vaxtında və ünvanlı humanitar fəaliyyətin zəruri olduğu bildirilib və yardımın edilməsi xahiş olunub.

“Davamlı iqtisadi artım Azərbaycana öz milli inkişaf strategiyasına diqqəti yönəltməklə yanaşı, beynəlxalq inkişafı da fəal şəkildə dəstəkləməyə imkan verib”, - XİN-in məlumatında belə deyilir.

“Azərbaycan Heydər Əliyev Fondu, AİDA və digər qurumlar vasitəsilə beynəlxalq humanitar yardım və davamlı inkişaf layihələrini dəstəkləyir. 2017-2019-cu illər üçün Azərbaycanın BMT-nin İqtisadi və Sosial Şurasına üzv seçilməsi davamlı inkişafa dair aparılan müzakirələrdə daha fəal rol oynamaq və beynəlxalq səviyyədə inkişafa töhfə vermək üçün əlavə imkanlar yaradır”.