Reuters agentliyi xəbər verir ki, “Qızıların susqunluğu” kimi trillerlərdən tutmuş tanınmış musiqiçilərin həyatı barədə sənədli filmlərədək ən müxtəlif kinematoqrafik əsərlərə imza atmış məşhur kinorejissor Jonathan Demme 73 yaşında qida borusunun xərçəngindən vəfat edib.

Xəbərdə deyilir ki, Demme Manhattandakı mənzilində xanımı Joanne Howard və üç övladının çevrəsində keçinib.

Demme-in ən son bədii filmi 2015-ci ildə çəkilmiş "Ricki və Flash” tragikomediyası idi.

[caption id="attachment_32684" align="alignnone" width="650"] "Quzuların susqunluğu" filmində Hannibal Lecter obrazı[/caption]

Bu filmdə baş rolu oynamış Meryl Streep rejissoru “böyük qəlbli insan” adlandırıb.

Nyu Yorkda doğulmuş Demme-in 1991-ci ildə çəkdiyi “Quzuların susqunluğu” (The Silence of the Lambs) onun özünə və baş rolların ifaçıları Anthony Hopkins və Jodie Fosterə Oscar mükafatı qazandırmışdı.

Kino tənqidçiləri Demme-i sözün əsl mənasında çoxçalarlı rejissor adlandırırlar. Onun 1993-cü ildə çəkdiyi “Filadelfiya” filmi Hollivudda AİDS xəstəliyi böhranı ilə bağlı ilk cəsarətli rejissor işlərindən biri olmuşdu.

Bu filmdəki roluna görə Tom Hanks Oscar mükafatına layiq görülmüşdü.

Demme həm də Bruce Springsteen, Kenny Chesney və Neil Young kimi müğənnilər barədə musiqili sənədli filmlərin rejissoru olmuşdu.

Jonathan Demme-in başqa diqqətəlayiq filmləri 2008-ci ildə çəkilmiş “Rachel ərə gedir” (Rachel Getting Married), “Mancuriya namizədi” (2004) (The Manchurian Candidate) və “Mafiyanın arvadı” (1988) (Married to the Mob) idi.