Hollandiyada yaşayan müxalif bloqqer Orduxan Teymurxanın ailə üzvləri və yaxın qohumları Azərbaycan prezidenti İlham Əliyevə müraciət ediblər.

Müraciətdə bildirilir: “Ölkəmizdə yaşamayan və Azərbaycan vətəndaşlığı belə olmayan bir şəxsin respublikamız və onu tərəqqiyə və inkişafa doğru aparan hörmətli prezidentimizin ünvanına heç bir həqiqətə uyğun olmayan ifadələr işlədilməsini pisləyir və şiddətlə qınayırıq. Onun Azərbaycandan kənarda hansısa xarici qüvvələrin təsiri altında həyata keçirdiyi anti-Azərbaycan fəaliyyətini dövlətimizə və xalqımıza qarşı xəyanət kimi qiymətləndiririk. Hesab edirik ki, bu günə kimi həyatda heç bir nailiyyət əldə etməmiş, savadsız bir adamın Azərbaycan hakimiyyətinə iradlar bildirməsi yolverilməzdir”.

Müraciəti Orduxan Teymurxanın qardaşı Bəbir Bəbirov, bacıları Rübabə Zeynalova, Sədaqət Ağayeva, Südabə Əliyeva, həmçinin yaxın qohumları Səbuhi Zeynalov, Vüsal Əliyev, Vasif Əliyev, Tural Əliyev, Xəyalə Bəbirli, Turan Bəbirli, Xumar Nəzərova və Vəli Əliyev imzalayıblar.

Avropada Azərbaycan höküməti aleyhinə keçirilən aksiyadan sonra bloqqer Orduxan Teymurxanın qohumları fevralın 18-də Suraxanı rayon Polis İdarəsinin 32-ci polis bölməsinə aparılıblar. Fevralın 19-u onun bacılarını sərbəst buraxsalar da, qardaşı, yeznəsi və bacısı oğlu polis bölməsində saxlanılmışdı.

Ardınca Suraxanı rayon Məhkəməsində bloqqerin qardaşı Xanlar Dadaşov və bacısı oğlu Səbuhi Zeynalovun 30 sutka inzibati həbsi haqda qərar çıxarılmışdı.

Bir müddət sonra bloqqerin bacısı, bacısı oğlu və yeznəsi mətbuat vasitəsilə ondan imtina etdiklərini bəyan etmişdi.

Bloqqer isə bu cür təzyiqlərin ona təsir etmədiyini bildirib: "Mənim üçün fərqi yoxdur, Azərbaycanımdan, xalqımdan üz döndərməyəcəm, onların azad, firavan yaşaması, ölkəmizin çiçəklənməsi üçün əlimdən gələni edəcəm. Bu yolda beləcə ölüb gedəcəm, amma mübarizəmdən dönməyəcəm".