Neft İxrac Edən Ölkələr Təşkilatının (OPEC) Baş katibi Məhəmməd Barkindo, kartelin ABŞ-ın neft istehsalçıları ilə dialoqa başladığını söyləyib.

"Marja" xəbər verir ki, "IHS CERAWeek 2017" Enerji Konfransında çıxış etmiş Barkindo, 2014-ci ilin ortasından düşməyə başlayan neft qiymətləri səbəbilə, OPEC-lə ABŞ-ın neft istehsalçılarının qlobal bazarda qarşı-qarşıya gəlməsinə dair, "Biz OPEC olaraq heç zaman ABŞ-ın neft istehsalçıları ilə müharibə vəziyyətində olmadıq",-deyib.

Qiymətlərin düşməsi səbəbinin ABŞ-da şist nefti istehsalındakı artım olduğunu şərh edən Barkindo, aşağı neft qiymətlərinin ən çox Amerikalı neft şirkətlərinə təsir etdiyini bildirib.

Barkindo, OPEC rəsmilərinin ABŞ-ın şist nefti istehsalçısı şirkətlərlə keçən həftə bir görüş keçirdiyini və iki qrup arasında dialoqun başladığını bildirib. Sözügedən görüşün müsbət keçdiyini bildirən Barkindo, amerikalı neft şirkətlərinin aşağı qiymətlərə qarşı istehsalın məhsuldarlığını yüksəltmək və xərcləri azaltmaq kimi mövzulardakı təcrübələrini OPEC rəsmiləri ilə bölüşdüyünü qeyd edib. Barkindo, "Keçmişdən OPEC rəsmilərinin neft bazarındakı digər aktyorlarla görüşü pis addım sayılırdı, ancaq dövr dəyişdi, bazar dəyişib. İndi hamımız eyni gəmidəyik. Neftin qiymətinin aşağı düşməsi bütün sənayeyə mənfi təsir edir" -şərhini edib. "Qlobal bazarda xam neft ehtiyatları hələ də yüksək səviyyədədir"

Yanvar ayında tətbiq olunmağa başlanan və OPEC-lə kartelə daxil olmayan ölkələrin hasilatlarını azaltmağı qarşısına məqsəd qoyan müqavilə ilə bağlı fikirlərini də bölüşən Barkindo, qlobal bazarda xam neft ehtiyatlarının hələ də yüksək səviyyədə olduğunu dilə gətirib. Barkindo, OPEC üzvü olmayan və dünyanın ən böyük neft istehsalçısı olan Rusiyanın səylərinin də müsbət qarşılandığını bildirərək, Rusiyanın kartel xaricində istehsalını azaldan 10 ölkəyə "liderlik" etdiyini ifadə edib Müqavilənin uğurlu olması üçün OPEC üzvü olan ölkələrin "müqaviləyə 100 faiz əməl etmələrinin şərt olduğunu" vurğulayan Barkindo, iyun ayının sonunda qlobal bazardakı xam neft ehtiyatlarına və neft qiymətlərinə baxılaraq OPEC və kartelə daxil olmayan istehsalçı ölkələrin yeni vəziyyəti qiymətləndirəcəyini sözlərinə əlavə edib.

Qeyd edək ki, neft qiymətlərinin 50 dolların üzərinə çıxmasından istifadə edən ABŞ-ın neft istehsalçıları hasilatlarını yenidən artırmağa başlayıblar. ABŞ-da hasilatın artması neft qiymətlərinin qalxmasına imkan vermir. Əgər ABŞ-ın neft istehsalçıları hasilatın dondurulması və ya azaldılması barədə OPEC-lə razılaşarsa neft qiymətləri xeyli qalxa bilər.