Milli Şuranın sədri Cəmil Həsənli

2016-ci ilin sosial-iqtisadi yekunları ilə bağlı Nazirlər Kabinetin iclası ölkənin içində olduğu böhranın hansı fəlakətli həddə gəlib çatdığını nümayiş etdirdi.

Ən böyük dərd odur ki, bu ölkəni idarə edənlər real həqiqətləri görüb ölkəni düşdüyü vəziyyətdən çıxarmaq istəmirlər. Bu məmləkətdə yeridilən səhv siyasətin nəticəsi olaraq ölkədə işləyənlərin yarıya qədərinin, pensiyaçıların isə yarıdan çoxunun günlük gəliri 2016-cı ildə 2-3 dollar səviyyəsinə enib. Bunlar isə əmək haqqının 7 faiz, pensiyaların 8 faiz artmasını böyük qələbə kimi qeyd edib böyük uğura imza atdıqların bəyan edirlər.

Yaxşı, deyək ki, belədir: bu artımdan sonra hökumətin rəsmi qurumları bildirir ki, ölkədə pensiyaların orta aylıq məbləği 189 manatdır. Bu 189 manatı biçarə pensiyaçının 30 gününə bölsək, onun hər gününə 3 dollar 50 sent pul düşür. İndi korrupsiya və yolsuzluğa mübtəla olmuş bir neçə Afrika ölkələrini kənara qoysaq, hansı normal ölkədə vətəndaşın günlük gəliri 2-3 dollar arasındadır?

Təkcə bu fakt ölkənin hansı uçuruma gətirilib çıxardılmasının aydın bir göstəricisidir. Mövcud acınacaqlı duruma toxunan bəziləri belə bir fikir səsləndirirlər ki, cənab İlham Əliyev bu komanda ilə islahat apara bilməz. Lakin sonuncu müşavirə bir daha göstərdi ki, islahatların yolunda başlıca maneə komanda deyil, İlham Əliyevin özüdür.

2016-cı ildə ölkənin aparıcı iki nazirliyində baş verən rüsvayçılıqlar aşkar oldu. Məlum oldu ki, eyni hökumətin içində olan bir nazirlik o biri nazirliyin rəhbər işçilərinə aylıq verir. Məlum oldu ki, Rabitə nazirliyində 10 il boyunca satınalmaların və xidmətlərin qiyməti 35 faiz artırılıb və nəticədə qara kassaya yığılan korrupsiya pullarından, büdcə oğurluğundan aidiyyəti olan hər kəsə pay düşüb. Axı, Əli Abbasov bunu özbaşına etməyib.

Eyni satınalmaları, eyni xidmətləri götürsək ölkənin digər nazirlik, idarə və komitələrində də eyni vəziyyətdir, hətta rabitəçilərdən də pis vəziyyətdə olanlar var. Deməli bu şişirtmələr büdcə vəsaitlərini oğurlamaq, ölkəni talayıb hazırkı acınacaqlı duruma salmaq üçün razılaşdırılmış bir şəbəkə olub və hazırda da olmaqda davam edir. Necə olur ki, nazir 10 il ərzində hər ay 300 min manat paket alır, bunun iki mislini də ayrı bir nazirə göndərir ancaq prezidentin bundan xəbəri olmur?

Bax, ölkənin ağrıyan yerini ifadə edən iqtisadçıları təhqir etmək əvəzinə bunlara cavab vermək lazım idi müşavirədə. Əslində, son illərdə ölkəmizdə son dərəcə istedadlı, səriştəli, doğru, dürüst, dünyada gedən sosial-iqtisadi proseslərdən baş çıxaran Qubad İbadoğlu, Vahid Məhərrəmli, Nemət Əliyev, Azər Mehdiyev, Natiq Cəfərli, Rövşən Ağayev, Samir Əliyev, Məhəmməd Talıblı, Zöhrab İsmayıl və digərlərindən ibarət böyük elmi və praktiki potensiala malik olan iqtisadçılar nəsli yetişib.

Ötən illər ərzində hökumət onların səmərəli təkliflərin, obyektiv təhlillərin, dərin analizlərin, həyəcanlı proqnozların nəzərə alsaydı, ölkə gəlib indiki təhlükəli uçurumun astanasında dayanmaz, böhranın dağıdıcı təhdidi ilə üzləşməzdi.