Emal müəssisələrinə satılmış hər kiloqram xam pambığa görə, istehsalçılara 0,1 manat (10 qəpik) subsidiya veriləcək.

Prezident İlham Əliyevin sentyabrın 22-də imzaladığı pambıqçılığın inkişafına dövlət dəstəyi haqqında sərəncamda belə nəzərdə tutulur.

Sərəncamla müəyyən edilən subsidiyalar 2016-cı ildə istehsal olunan və emal müəssisələrinə satılmış xam pambığa da şamil ediləcək.

Sərəncama əsasən, Nazirlər Kabineti emal müəssisələrinə satılmış hər kiloqram xam pambığa görə, istehsalçılara subsidiyanın verilmə qaydasını hazırlayacaq.

Xatırladaq ki, prezident İlham Əliyev sentyabrın 17-də Sabirabad rayonunda olarkən pambıqçılığın inkişafına dair müşavirə keçirmişdi. Həmin müşavirədə Azərbaycanda pambıqçılığın inkişafı prioritet olduğu qeyd edilib.

Hökumətin qərarına əsasən, 2007-ci ildən yanacaq və motor yağlarının istifadəsinə görə fermerlər 1 hektara 50 manat subsidiya alır. Həmin vaxt ölkədə yanacağın qiyməti artırılmışdı.

Buğda, çəltik, tütün əkininə görə də, qeyd edilən məbləğə 40 manat əlavə edilir.

Prezidentin yeni sərəncamına görə, 100 kiloqram pambığa 10 manat subsidiya düşür.