“Azadlıq” qəzetinin siyasət şöbəsinin müdiri, həbsdə olan jurnalist Seymur Həzi səhhətindəki problemlərlə bağlı xəstəxanaya yerləşdirilmir.

Jurnalistin xanımı Nigar Həzi Meydan TV-yə bildirib ki, 16 noyabrda yenidən yoldaşı ilə danışıb. O deyib ki, səhhətindəki problemlər hələ də qalmaqdadır. Jurnalist revmatizm xəstəliyindən əziyyət çəkir.

Nigar Həzi bildirib ki, yoldaşının cəza çəkdiyi 17 saylı Cəzaçəkmə Müəssisəsinin rəhbərliyi onu xəstəxanaya göndərməməkdə israrlıdır.

Ədliyyə Nazirliyinin Tibb Baş İdarəsinin rəis müavini İftixar Qurbanov Meydan TV-yə bildirib ki, 15 noyabrda həkimlər jurnalisti müayinə edib və qan analizi götürüblər. “Seymur Həzi oynaq ağrılarından şikayət edib. Revmatizm elə bir xəstəlikdir ki, ola bilsin payız aylarında ağrılar olsun. Onu qanla müəyyənləşdirirlər ki, kəskinləşib, yoxsa yox. Dünən göstəriş verdim ki, qanından analiz götürülsün. Revmatizm elə bir təhlükəli, ağır xəstəlik deyil. Analizin nəticəsində revmatizmin kəskinləşdiyi aşkarlanarsa, o, xüsusi müalicəyə cəlb olunacaq”.

Seymur Həzi “Azadlıq” qəzetinin siyasət şöbəsinin müdiri, “Azərbaycan saatı” verilişinin redaktoru və aparıcısı işləyib. O, 2014-cü ilin avqustun 30-da həbs edilib. Jurnalist xuliqanlıqda ittiham olunaraq Abşeron rayon Məhkəməsinin hökmü ilə 5 il azadlıqdan məhrum edilib.

S.Həzi bu ittihamı qondarma adlandırıb və həbsini hakimiyyəti tənqid edən yazıları və çıxışları ilə əlaqələndirib.

“Amnesty İnternational” təşkilatı Seymur Həzini “vicdan məhbusu” kimi tanıyıb.