Bu gün, iyulun 22-də Azərbaycan milli mətbuatının 149 yaşı tamam olur.

1875-ci ilin bu günü maarifçi Həsən bəy Zərdabi “Əkinçi” qəzetini nəşr etdirməklə milli mətbuatın əsasını qoyub.

Prezident İlham Əliyev dəfələrlə ölkədə söz və mətbuat azadlığının qorunduğunu, senzuranın olmadığını desə də, yerli medianın böyük əksəriyyəti hökumətin nəzarəti altındadır. Ötən ilin noyabrından başlayaraq ölkədə müstəqil mediaya qarşı təzyiq və təqib dalğası başlayıb.

“Abzas Media”nın 6 əməkdaşının həbsi ilə başlayan bu dalğa Kanal 13, Toplum TV, məclis info kimi media orqanlarının jurnalistlərinin və təsisçilərinin həbsi ilə davam edib. Polis onların evlərinə basqın edib və media orqanlarının ofisləri möhürlənib. İyunun 14-də Azərbaycanda Siyasi Məhbusların Azadlığı Uğrunda İttifaqın yaydığı hesabata əsasən, hazırda ölkədə 20 jurnalist və bloqqer siyasi məhbus var.

Jurnalist Aynur Elgünəş deyir ki, hökumət periodik olaraq jurnalistlərin səslərini boğmaqla ölkədə azad media mühitini məhv etməyə çalışır.