Masallıda polislərin ata və oğulu qanunsuz saxladıqları bildirilir

Günay Abbasova deyir ki, həyat yoldaşı Taleh Abbasovu və 16 yaşlı oğlunu Masallı rayonunda polislər qanunsuz  saxlayıb.

G. Abbasova Abzas Media-ya bildirib ki, yoldaşının 2020-ci ildə 700 manata qədər avtomobil cəriməsi olub. O, cəriməni ödədiklərini və bununla bağlı qəbzlərinin də olduğunu deyir:

"Mayın 4-ü Masallıda postda yoldaşımı polislər saxladı, hamımız maşında idik. Yoldaşım bildirdi ki, cərimə ödənib, ödəniş qəbzi də var. Dedilər, sistemə düşməyib. Yoldaşım da dedi ki, "sistemə düşməyibsə, bu mənim problemim deyil axı". İçəri getdilər, orada nəsə mübahisə olub, yoldaşım və 16 yaşlı oğlumun qolunu qandallayıb Masallı Rayon Polis Şöbəsinə apardılar".

G. Abbasova iddia edir ki, yoldaşının və oğlunun sərbəst buraxılması üçün onlardan rüşvət istəyiblər:

"Yaxınlarımız polislərlə danışdı, deyiblər ki, 2000 manat pul gətirin, burada ödəniş edin və ödənişlə bağlı heç yerə şikayət etməyin. Onlar deyib ki, yoldaşım və oğlum ancaq bu halda buraxılacaq. Biz cəriməni ödəmişik, bu istənilən pul rüşvətdir, niyə ödəməliyik?! Ödəniş qəbzlərin, yoldaşımın vəsiqələrini maşından zorakılıqla götürüb, apardılar.

Tanışlar vasitəsilə yoldaşımla bir dəfə danışdım. Dedi ki, məndən rüşvət istəyirlər, mən rüşvət verməyəcəm. Qanun nədir, cəzamı versinlər, bunlara pul verməyəcəm. Bunlar deyirlər ki, pul ver, səni buraxırıq”.

Şikayətçi deyir ki, oğlunu və yoldaşını əli qandalllı vəziyyətdə Masallı rayon Məhkəməsinə aparıblar: 

"Uşağım aparılanda çəkliş etdim, telefonu  əlimdən aldılar və görüntüləri sildilər. Qardaşıma deyiblər ki, guya içəridə söyüş söyülüb, nəsə sındırılıb. Haqqımı istəyirəm. Azadlığa buraxılsınlar, qanun nədir, o olsun. Sən mənim azyaşlı uşağımı qandallayıb apara bilməzsən”.

Daxili İşlər Nazirliyinin mətbuat xidmətinin şöbə rəisi Elşad Hacıyev Abzas Media-ya açıqlamasında deyilənləri təkzib edib: “Şəxsdən buraxılması üçün rüşvətin istənilməsi mümkün olan məsələ deyil”.