İran prezidenti İbrahim Rəisi Şərqi Azərbaycan əyalətində helikopterin qəzaya uğraması nəticəsində göyərtədə olan bütün sərnişinlərlə birlikdə həlak olub.

İranın İRİB, eləcə də “Mehr” xəbər agentlikləri bildirib ki, Rəisinin ölümü barədə ilk olaraq İranın Qızıl Aypara Cəmiyyətinin rəhbəri Pir Hüseyn Kolivənd xəbər verib.

“Qəzaya uğrayan helikopterin yeri müəyyən edilsə də, təəssüf ki, hələ sərnişinlərinin sağ olmasına dair heç bir əlamət yoxdur”, - deyə Kolivənd bildirib.

Daha sonra İbrahim Rəisinin ölümü ilə bağlı xəbərləri İranın vitse-prezidenti Möhsün Mənsuri də təsdiqləyib.

Anonim İran rəsmisi “Reuters”ə bildirib ki, qəza zamanı helikopter tamamilə yanıb.

Rəisidən başqa, helikopterdə Təbrizin imam-cüməsi Ayətullah Əl Haşim, xarici işlər naziri Hüseyn Əmir Abdullahian və Şərqi Azərbaycan valisi Malik Rəhməti də olub.

“Tasnim” və “Imena” xəbər agentlikləri bildirib ki, təbii fəlakət nəticəsində ümumilikdə 8 nəfər ölüb. Qəza qurbanlarının hamısının cəsədlərinin tanınması istiqamətində işlər davam etdirilir.

İran prezidenti İbrahim Rəisinin vertolyotu mayın 19-da İran-Azərbaycan sərhədi yaxınlığındakı Vərziqan şəhərinə yaxın dağlıq əraziyə “sərt eniş edib”. Rəisi İranın Azərbaycanla sərhəddə yerləşən Şərqi Azərbaycan əyalətindən qayıdırmış. Orada o, prezident Azərbaycan prezidenti İlham Əliyevlə Araz çayı üzərində “Xudafərin” hidroqovşağının istismara verilməsi və “Qız Qalası” hidroqovşağının açılış mərasimlərində iştirak edib.

Prezidentin kortejində üç helikopter olub, yalnız biri itib. Axtarış əməliyyatlarına hava şəraiti mane olub - qəzanın baş verdiyi ərazidə yağış və qatı duman olub.

İran televiziyası Rəisi üçün dualar edilməsi üçün yayımlandığı bütün proqramları dayandırıb. İran prezidentinin İnstaqram səhifəsində də onun üçün dualar edilib.

İran Konstitusiyasının 131-ci maddəsinə görə, prezidentin vəfat etdiyi halda onun səlahiyyətləri birinci müavinə keçir. 2021-ci ildən bu vəzifəni Məhəmməd Müxbir tutur.

“Prezident iki aydan artıq müddətdə vəfat etdikdə, vəzifədən azad olunduqda, istefaya getdikdə, xidmətdə olmadıqda və ya xəstələndikdə, yaxud Prezidentin səlahiyyət müddəti başa çatdıqda və maneələrə və ya digər səbəblərə görə yeni Prezident hələ seçilmədikdə Birinci vitse-prezident öz bütün vəzifə və səlahiyyətlərini öz üzərinə götürür”, – İran Konstitusiyasının mətnində deyilir.

50 gün ərzində İranda növbədənkənar prezident seçkiləri keçirilməlidir.

İran mətbuatı xəbər verir ki, İran hökuməti fövqəladə iclas keçirərək prezident İbrahim Rəisinin helikopter qəzasında həlak olması ilə bağlı bəyanat verəcək.

İran dövlət televiziyası müntəzəm yayımını dayandırıb. Futbol üzrə Premyer Liqanın oyunları ləğv edilib. Tehran birjası ticarəti dayandırıb.

Rəisinin vəfatı ilə əlaqədar İraqın baş naziri Məhəmməd əl-Sudani, Hindistanın baş naziri Narendra Modi, Venesuela prezidenti Nikolas Maduro və Həmas qruplaşması başsağlığı verib.

Pakistanda bir günlük matəm elan edilib.

İranda baş verən faciə ilə bağlı Belarus Xarici İşlər Nazirliyi Minskin əsl dostlarının dünyasını dəyişdiyini bəyan edib.