Türkiyə prezidenti Rəcəb Tayyib Ərdoğan Rusiya prezidenti Vladimir Putinin ona "Bayraktar" pilotsuz uçan aparatlarının istehsalçısı "Baykar" şirkəti ilə əməkdaşlıq etmək arzusundan danışdığını bildirib.
CNN Türk-ün məlumatına görə, Ərdoğan belə bir bəyanatla partiyanın Mərkəzi İcraiyyə Komitəsinin iclasında çıxış edib.
Ərdoğanın sözlərinə görə, Birləşmiş Ərəb Əmirlikləri də "Bayraktar"la maraqlanıb, öz ərazisində pilotsuz təyyarələrin istehsalı üçün zavod tikməyi təklif edib.
"Bayraktar-TB2" pilotsuz uçuş aparatlarının Ukrayna hərbçiləri tərəfindən sıx şəkildə istifadə edildiyi və bunun Rusiya əsgərlərinə ciddi ziyan vurduğu bildirilir. Rusiya Federasiyasının Müdafiə Nazirliyi bu cür pilotsuz təyyarələrin məhv edilməsi barədə mütəmadi olaraq məlumat verir. Üstəlik, "Proekt" nəşrinin qeyd etdiyi kimi, Müdafiə Nazirliyinin hesabatlarında Ukrayna ordusunda xidmət edən 20-yə yaxın "Bayraktar" məhv edilib.
Bir neçə həftə əvvəl Rusiyanın İrandan pilotsuz təyyarələr almağa hazırlaşdığı barədə məlumatlar yayılmışdı. Hər iki ölkənin rəsmiləri bunu inkar edir, lakin ABŞ mənbələri deyir ki, Rusiya rəsmiləri iyunda və iyulun əvvəllərində Tehranın cənubundakı aerodromda olub və onlara dəqiq idarə olunan raketləri daşıya bilən pilotsuz təyyarələr göstərilib.
