Rusiya artilleriyasının Kiyev vilayətinin Şevçenkove kəndini atəşə tutması zamanı ukraynalı jurnalist Oksana Qaydar həlak olub. Bu barədə Ukrayna Jurnalistlər Milli Birliyinin rəhbəri Sergey Tomilenko Facebook səhifəsində məlumat verib. Qaydarın və anası Lidiyanın martın 11-12-si tarixlərində öldükləri bildirilir, lakin onların ölümü barədə yalnız indi məlum olub. Jurnalistin sonuncu dəfə martın 11-də tvit paylaşıb. Tomilenko qeyd edib ki, Qaydar sosial şəbəkələrdə 'Ruda Pani' təxəllüsü ilə tarixi mövzularda nəşrləri və mesajları ilə tanınıb. Onun sözlərinə görə, jurnalist “Rusiya hökumətinin imperiya ambisiyalarını və nəyin bahasına olursa-olsun Ukrayna üzərində nəzarəti qurmaq istəyini pisləyib". Oksana Qaydar Kiyevdə doğulub və təhsil alıb, sonra həyat yoldaşı və oğlu ilə birlikdə Moskvada yaşayıb. Müharibə başlayandan sonra o, anasının yanında olmaq üçün Ukraynaya qayıdıb. Müharibə başlayandan bəri Ukraynada bir neçə ukraynalı və xarici jurnalist həlak olub. Martın 13-də məlum olub ki, “The New York Times” qəzeti ilə işləyən amerikalı jurnalist Brent Reno Kiyev vilayətinin İrpen şəhərində öldürülüb, onun həmkarı isə yaralanıb. İki gün sonra “Fox News” telekanalının 55 yaşlı irlandiyalı operatoru Pyer Zakrzevski və telekanalın 24 yaşlı yerli prodüseri Aleksandra Kuvşinovanın ölümü ilə bağlı xəbər yayılıb. Martın 23-də Kiyevdə “The Insider” jurnalının jurnalisti Oksana Baulina atəşə məruz qalıb, martın 28-də isə “Azadlıq” radiosunun Ukrayna xidmətinin jurnalisti Vera Qiriç raket hücumu nəticəsində ölüb. Aprel və may aylarında ukraynalı fotoqraf və sənədli film ustası Maks Levin və müharibə müxbiri və blogger Aleksandr Maxovun ölümü ilə bağlı xəbərlər yayılıb.