Biznesmen Oleq Tinkov “The New York Times” qəzetinə müsahibəsində bildirib ki, Rusiya hakimiyyəti onu həqiqətən ˝TCS Group˝-dakı ailə payını (Tinkoff Bank, Tinkoff Insurance və digər aktivlərin sahibi) satmağa məcbur edib. Tinkovun sözlərinə görə, o, ˝TCS Group˝ üçün real aktiv dəyərinin cəmi 3%-ni alıb. İş adamı məbləği qeyd etmədən “qəpik-quruşa satdım” deyib. Tinkov müharibə əleyhinə bəyanatlar verdikdən sonra səhmini təcili satmaq məcburiyyətində qaldığını bildirib. Onun sözlərinə görə, prezident administrasiyasının nümayəndələri də bankın rəhbərliyi ilə əlaqə saxlayıb və ˝Tinkoff˝ təsisçi ilə əlaqələrini pozmasa, onu milliləşdirəcəkləri ilə hədələyiblər. “Bu, girov vəziyyətinə bənzəyirdi - sənə təklif etdiklərini alırsan. Danışıq apara bilmədim”, - Tinkov bildirib. Bununla belə, iş adamı vurğulayıb ki, o, hər halda Rusiya aktivlərindən çıxmağa hazırlaşırdı, çünki indiki hökumət dövründə “Rusiyanın gələcəyinin olduğuna inanmır” və “onun brendi və adının heç bir səbəb olmadan qonşularına hücum edən ölkə ilə assosiasiya edilməsinə hazır deyil˝. Tinkov əmin edir ki, bir çox yüksək vəzifəli məmurlar və iş adamları şəxsi söhbətlərində baş verənlərdən narazılıqlarını ifadə edirlər, lakin bunu ictimaiyyətə açıqlamaqdan qorxurlar. “Onlar Qərblə bağlı olduqlarını başa düşürlər, amma ölkə sürətlə İrana çevrilir. Və bunu bəyənmirlər. Onlar uşaqlarının yay tətilini Sardiniyada keçirmələrini istəyirlər”. Oleq Tinkov ailəsinə məxsus ˝TCS Group˝-un 35 faizinin Vladimir Potaninin ˝Interros˝ qrupuna satılması aprelin 28-də məlum olub. Aprelin 19-da Rusiyanın Ukraynaya müdaxiləsindən sonra sanksiya siyahısında olan Tinkov müharibəni “dəlilik” adlandırmışdı. ˝Tinkoff Bank˝da təsisçinin sözləri ˝onun şəxsi˝ fikri adlandırılıb. Tezliklə bank rebrendinq edəcəyini və daha ˝Tinkoff˝ adlandırılmayacağını elan edib.