Kanada parlamentinin aşağı palatası olan İcmalar Palatası Rusiyanın Ukraynadakı hərəkətlərini soyqırım adlandıran qətnaməni yekdilliklə təsdiqləyib. Bu barədə Kanadanın “Global News” nəşri xəbər verib. Qətnamədə bildirilir ki, Rusiya qoşunlarının Ukrayna ərazisində “sistemli və kütləvi hərbi və insanlığa qarşı cinayətlər törətməsinə dair aydın və kifayət qədər sübutlar” var. İcmalar Palatasında qətnamə ilə bağlı rəsmi səsvermə olmayıb. Sənəd məcburi deyil və Kanada Hökumətini hər hansı bir tədbir görməyə məcbur etmir. Beynəlxalq hüquqa görə də bunun nəticələri olmayacaq. Qətnaməni İcmalar Palatasına Yeni Demokrat Partiyasından (NDP) deputat Hizer Makferson təqdim edib. O, bu yolla Kanada hökumətini Rusiyaya qarşı əlavə tədbirlər görməyə, xüsusən də yeni sanksiyaların tətbiqinə sövq etmək istədiyini söylədi. Kanadanın CBC telekanalı Makfersondan sitat gətirib: "Bu, Ukraynadakı münaqişənin bitmədiyini, verdiyimiz dəstəyin kifayət etmədiyini və Ukrayna xalqı üçün daha çox şey etməli olduğumuzu söyləmək üsuludur". Bundan əvvəl Rusiya ordusunun Ukraynadakı hərəkətləri Estoniya və Latviya parlamentləri tərəfindən soyqırım elan edilib. “Soyqırımı cinayətinin qarşısının alınması və cəzalandırılması haqqında” Konvensiyaya əsasən, soyqırım milli, etnik, irqi və ya dini qrupun tamamilə və ya qismən məhv edilməsi aktıdır. Konvensiyada deyilir ki, BMT-nin Beynəlxalq Cinayət Məhkəməsi konkret qrupa qarşı soyqırım törədilib-törəmədiyinə qərar vermək səlahiyyətinə malikdir. O, hələ də Rusiyanın Ukraynadakı hərəkətlərini soyqırım adlandırmayıb. Ukrayna prezidenti Volodimir Zelenski və ABŞ prezidenti Co Bayden Rusiya-Ukrayna müharibəsində baş verənləri soyqırım adlandırıblar (eyni zamanda Ağ Ev bunun Baydenin şəxsi fikri olduğunu qeyd edib). Fransa prezidenti Emmanuel Makron Ukrayna hadisələri ilə bağlı “soyqırım” sözünü işlətməkdən imtina edib. Rusiya Ukraynadakı qoşunlarının hərəkətlərini soyqırım kimi qiymətləndirməkdən imtina edir. Eyni zamanda, Rusiya rəsmiləri 2014-cü ildən sonra Donbassda hərbi əməliyyatlarla bağlı hadisələri soyqırım adlandırıblar. Onlar Ukraynanın işğalının səbəblərindən biri kimi göstərilib. BMT-nin baş katibi Antonio Quterreş Donbassda baş verənləri soyqırım hesab etməkdən imtina edib. Kanadadakı Ukrayna diasporu dünyada Rusiyadan sonra ikinci ən böyük diaspor hesab olunur. Kanadada təxminən 1,4 milyon ukraynalı insan yaşayır.