˝Proekt˝ nəşri Rusiya prezidenti Vladimir Putinin səhhətində baş verənlərdən bəhs edən araşdırma yayıb. Jurnalistlər prezidentin Rusiya daxili rəsmi səfərləri zamanı dövlət mehmanxanalarında həkimlərin yerləşdirilməsi ilə bağlı yüzlərlə dövlət müqaviləsini araşdırıb və prezidentin səhhətinə daim nəzarət edən mütəxəssislərin siyahısını tərtib ediblər. Onların arasında onkoloq da var. Rusiyada Putinin səhhəti ilə bağlı məlumatlar mahiyyətcə məxfiləşdirilib. Araşdırmaçıların fikrincə, Kremldə “ömrünün ən yaxşı çağında fəal kişi obrazı” quraraq, ictimaiyyətə prezidentin vəziyyəti ilə bağlı pis heç nə deməmək qərarına gəliblər. Materialda deyilir ki, prezident kimi fəaliyyətinin əvvəlində Putin nadir hallarda müayinə olunub və səhhətinə az diqqət yetirilib. Atçılıq idmanını sevən Putin üçün o illərdə ciddi problem atdan düşmək idi. Prezidentin tanışlarından biri “Proekt”-ə bildirib ki, prezident belə yıxılmaların birindən sonra  bir müddət “ayağa belə qalxa bilməyib”, sonra isə uzun müddət müalicə olunub. 2012-ci ildə Putin ilk dəfə ictimaiyyət qarşısına axsayaraq çıxıb - bu, Milli Birlik Günündə, prezident Minin və Pojarskinin abidəsi önünə gül qoyanda baş verib. jProekt˝-in qeyd etdiyi kimi, Putin televiziyada göstərilməməyə çalışılıb və mediaya prezidentin axsaması ilə bağlı yazmaq qəti qadağan edilib. 2012-ci ilin sonunda axsaqlıq daha da pisləşib və buna görə də prezidentin iştirakı ilə keçirilən bütün tədbirlərin müddəti bir saatla məhdudlaşdırılıb. Eyni zamanda, Kreml ilk olaraq Putinin işçilərlə görüşlərinin əvvəlcədən hazırlanmış videoyazılarından istifadə etməyə başlayıb. Bu da prezidentin rusların nəzərlərindən sakitcə itməsinə şərait yaradıb. Araşdırma müəllifləri iddia edirlər ki, belə videoyazılar ən azı 2015-ci ilin martında, 2017-ci ilin avqustunda, 2018-ci ilin fevralında və 2021-ci ilin sentyabrında istifadə edilib. Onların fikrincə, Putin yaşlandıqca alternativ təbabətə maraq göstərməyə başlayıb. Nəşr prezidentə yaxın mənbəyə istinadən yazır ki, Putin Rusiyanın hazırkı müdafiə naziri Sergey Şoyqunun ona məsləhət gördüyü buynuz vannaları qəbul edir. Altay marallarının gənc buynuzlarından alınan qanın faydalarına dair inandırıcı dəlil yoxdur, halbuki buynuzların kəsilməsi proseduru heyvanlar üçün ağrılıdır. Qəzet yazır ki, Putinin marağına görə gəncliyi uzatmaq üçün buynuz vannaları və bu kimi qeyri-ənənəvi üsullar digər yüksək vəzifəli şəxslər arasında populyarlaşıb. İllər keçdikcə Putin Moskvanın Kuntsevo rayonundakı Mərkəzi Klinik Xəstəxanaya getdikcə daha tez-tez baş çəkməyə başlayıb - "Proekt"-in mənbələrindən birinə görə, orada onu "şəxsi həkimlər şöbəsi" müşahidə edir. Eyni həkimlər Putini səfərlərdə müşayiət edir və onun iqamətgahına uçurlar. Müqavilələri araşdıran “Proekt”-in jurnalistləri belə qənaətə gəliblər ki, 2016-2017-ci illərdə prezidenti orta hesabla beş həkim müşayiət edib, lakin bəzən həkimlərin sayı “kəskin” şəkildə artıb. Belə ki, 2016-cı ilin noyabrında Putin beş gün ictimaiyyət qarşısına çıxmayıb və bu müddət ərzində 12 həkim dərhal Soçidəki "Rus" sanatoriyasında məskunlaşıb. Təhqiqat müəlliflərinin fikrincə, 2019-cu ilə qədər Putini orta hesabla doqquz həkim müşayiət edib: otorinolarinqoloqlar Aleksey Şçeqlov və İqor Esakov, həmçinin onkologiya və qalxanabənzər vəzi problemləri üzrə ixtisaslaşmış cərrah Yevgeni Selivanov daha çox prezidentin yanında olublar. 2021-ci ildə Putin ətrafdakıların çoxu COVID-19 ilə xəstələndiyinə görə, gözlənilmədən təcrid olunmalı olduğunu elan edib. ˝Proekt˝ yazır ki, bu xəbər hətta prezidentin ətrafı üçün də “sürpriz” olub. Bundan sonra prezident insanlardan çox uzaq məsafədə durmaqla onlarla ünsiyyət qurmağa başlayıb.