"Bir daha Ukrayna ordusunun NATO standartlarına cavab vermədiyini deməyin". Bunu Ukrayna Prezidenti Volodimir Zelenski NATO-ya üzv ölkələrin dövlət və hökumət başçılarının fövqəladə iclasında videoformatda çıxışı zamanı deyib. "Sizdən tək bir xahişim var. Hərbçilərimizin xətrinə xahiş edirəm... Artıq bir aydır davam edən belə bir müharibədən sonra... Rusiyaya qarşı müharibədən sonra... Sizdən xahiş edirəm ki, bir daha heç vaxt bizə ordumuzun NATO standartlarına cavab vermədiyini deməyin", - Ukrayna lideri bildirib. "Biz standartlarımızın nəyə qadir olduğunu göstərdik. Avropada və dünyada ümumi təhlükəsizliyə nə qədər töhfə verə bilərik, göstərdik. Dəyər verdiyimiz hər şeyi təcavüzdən qorunmaq üçün nələr edə bilərik, göstərdik", - o vurğulayıb. Zelenskinin sözlərinə görə, NATO hələ alyansın insanları xilas etmək üçün, dünyada həqiqətən güclü müdafiə ittifaqı olduğunu nümayiş etdirmək üçün nələr edə biləcəyini göstərməyib: "Dünya gözləyir. Ukrayna gözləyir. Real hərəkət gözləyirik. Əsl təhlükəsizlik təminatları... Sözünə güvənməyə dəyər, əməli sülhü qoruya bilənlərdən... Təkliflər masanın üstündədir. Bizim ehtiyaclarımız masanın üstündədir. Bizə dərhal sülh lazımdır. Cavab ancaq sizindir". "Sizin minlərlə döyüş təyyarələriniz var, amma birini də olsa bizə verməmisiniz". Zelenski vurğulayıb ki, nəzərə çarpan yardımlara baxmayaraq, Ukrayna hələ də müdafiə üçün lazım olan qədər silah qəbul etmir. O, Ukraynanın aviasiya vasitələri ilə yanaşı, digər silahlara da ehtiyac duyduğunu xatırladıb. "Ukrayna təyyarələr üçün sizə müraciət etdi. Beləcə, biz bu qədər insan itirməyəcəkdik. Sizin minlərlə döyüş təyyarəniz var. Onlardan biri də olsa bizə verilmədi. Biz tanklar üçün müraciət etdik. Biz şəhərlərimizi mühasirədən azad edə bilərdik. Mariupol, Berdyansk, Melitopol... O şəhərlər ki, Rusiya yüz minlərlə insanı əsir saxlayaraq süni aclıq yaradır. Sizin ən az 20 min tankınız var. Ukrayna 1%-ni istədi. Bütün tanklarınızın 1%-ni. Onları bizə verin və ya satın. Amma bizə aydın cavab verilmədi", - deyə Ukrayna Prezidenti bildirib.