BMT-nin Ukraynadakı İnsan Haqları Monitorinq Missiyasının rəhbəri Matilda Boqner həm Rusiya, həm də Ukrayna hakimiyyətini məhbuslara qarşı sui-istifadə hallarını araşdırmağa çağırıb, CNN onlayn xəbər verir. Bazar ertəsi brifinqdə Boqner deyib: "Biz həm Rusiya tərəfi tərəfindən əsir götürülən ukraynalı hərbi əsirlərin, həm də Ukrayna tərəfi tərəfindən əsir götürülən rus hərbi əsirlərinin videolarını gördük". Onun sözlərinə görə, BMT bu videoların doğruluğunu yoxlamaq mərhələsindədir, lakin baş verənlər "narahat etməyə bilməz". BMT ümid edir ki, münaqişənin hər iki tərəfi baş verənləri hərtərəfli araşdıracaq və günahkarları məsuliyyətə cəlb edəcək. Martın 27-də ukraynalı əsgərlərin əsir düşən rus əsgərlərinin ayaqlarına atəş açdığı iddia edilən video geniş yayılıb. Videonun nə vaxt və harada çəkildiyi məlum deyil. Ukrayna prezidentinin aparat rəhbərinin müşaviri Aleksey Arestoviç bildirib ki, videoda baş verənlərdə “müharibə cinayəti əlamətləri var” və “ən ciddi araşdırma” aparılacaq. Eyni zamanda, Ukrayna Silahlı Qüvvələrinin Ali Baş Komandanı Valeri Zalujnı bildirib ki, internetdə rus məhbusları ələ salan səhnələşdirilmiş videolar yayılır. Rusiya Federasiyası İstintaq Komitəsinin rəhbəri Aleksandr Bastrıkin “Ukraynalı millətçilərin əsir düşmüş hərbçilərlə amansız rəftarının” bütün hallarını müəyyən etməyi tapşırıb. Bu video ən çox müzakirə edilən videodur, lakin Ukrayna və Rusiya tərəflərinin bir-birini məhbuslarla pis rəftarda ittiham etdiyi yeganə hal deyil.